សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវជន៥នាក់ជិះម៉ូតូពីរគ្រឿង ប្រដេញគ្នាក្នុងល្បឿនលឿនជ្រុលទៅបុករ៉ឺម៉ក ដឹកបន្លែមួយគ្រឿង បើកដោយបុរសម្នាក់ឆ្លងផ្លូវពេញទំហឹង បណ្តាលឲ្យរ៉ឺម៉កក្រឡាប់ផ្ងារជើងម្ខាង របួសធ្ងន់ទាំង៦នាក់ ។
ហេតុការណ៍នេះ កើតឡើងកាលពីវេលាម៉ោង១និង៣០នាទី រំលងអាធ្រាត្រ ឈានចូលថ្ងៃទី១៧ ខែឧសភា ឆ្នាំ២០១៩ ស្ថិតនៅចំណុចមុខផ្សារស្ទឹងមានជ័យចាស់ តាមបណ្តោយផ្លូវ២១៧ ក្នុងសង្កាត់ស្ទឹងមានជ័យ១ ខណ្ឌមានជ័យ ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនកើតគេឃើញបុរសម្នាក់បើករ៉ឺម៉កដឹកបន្លែមួយគ្រឿង ធ្វើដំណើរតាមបណ្តោយផ្លូវ២១៧ទិសដៅពីកើតទៅលិច លុះមកដល់ចំណុចកើតហេតុខាងលើបានបត់ឆ្វេងដៃ ចូលទៅផ្លូវបេតុង ខណៈនោះក៏មានម៉ូតូពីរគ្រឿង មួយគ្រឿងម៉ាកហុងដាឌ្រីម សង់ស៊េរី ២០១៩ ពណ៌ខ្មៅ ពាក់ស្លាកលេខ ភ្នំពេញ 1DG-6971 ជិះដោយយុវជន៣នាក់ និងមួយគ្រឿងម៉ាក សុយស៊ូគីនីក ពណ៌ក្រហម ពាក់ស្លាកលេខ ភ្នំពេញ 1HI-8179 ជិះដោយយុវជន២នាក់ បើកប្រដេញគ្នាក្នុងល្បឿនលឿនបញ្ច្រាសទិសដៅគ្នាពីលិចទៅកើត បុកពេញទំហឹងបណ្តាលឲ្យរ៉ឺម៉កក្រឡាប់ផ្ងារជើងម្ខាង និងបណ្តាលឲ្យរងរបួសធ្ងន់ទាំង៦នាក់ ។ បន្ទាប់មករថយន្តសង្គ្រោះបន្ទាន់គ្លីនីកហុង ហាក់ដឹកយកទៅសង្គ្រោះបន្ទាន់ចំនួន៥នាក់ និងរថយន្តសង្គ្រោះបន្ទាន់ក្លីនីក រស្មីដឹកយកទៅសង្គ្រោះបន្ទាន់ចំនួន១នាក់ ។ រីឯរ៉ឺម៉កនិងម៉ូតូរងការខូចខាតយ៉ាងដំណំដូចគ្មា ។
ក្រោយកើតហេតុសមត្ថកិច្ចមូលដ្ឋានបានចុះមកដល់បានទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយករ៉ឺម៉កនិងម៉ូតូទៅរក្សាទុកនៅអធិការដ្ឋាននគរបាលខណ្ឌមានជ័យរង់ចាំដោះស្រាយគ្នាទៅតាមផ្លូវច្បាប់ ៕ ភារ៉ា ដង្កោ
