សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ហេតុការណ៍គ្រោះថ្នាក់ បង្កដោយរថយន្តព្រូសមួយគ្រឿង បានបុករះ ម៉ូតូរ៉ឺម៉ក និងម៉ូតូឥណ្ឌា ស្របទិសគ្នា បណ្តាលឲ្យស្រ្តីម្នាក់ស្លាប់ និងមនុស្សជាច្រើននាក់ទៀត រងរបួសធ្ងន់ កាលពីវេលាម៉ោង១រំលងអធ្រាត្រ ឈានចូលថ្ងៃទី១៧ ខែឧសភា ឆ្នាំ២០១៩ នៅតាមបណ្តោយផ្លូវជាតិលេខ១ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ ។
តាមប្រភពឲ្យដឹងថា ឃើញ រ៉ឺម៉កម៉ូតូធ្វើដំណើរ ដោយប្រុសស្រី២នាក់ និងកង់បីឥណ្ឌាធ្វើដំណើរ ដោយបុរស២នាក់ ព្រមទាំងក្មេងស្រីម្នាក់ ស្របគ្នាតាមផ្លូវជាតិលេខ១ ពីកើតទៅលិច ដល់ចំណុចកើតហេតុ ត្រូវរថយន្តមួយគ្រឿងម៉ាកព្រូស ពណ៌ស ពាក់ស្លាកលេខភ្នំពេញ 2AL-0427 បានទៅបុករះរ៉ឺម៉កម៉ូតូមួយគ្រឿង និងកង់បីឥណ្ឌាមួយគ្រឿង បណ្ដាលឲ្យស្ត្រីម្នាក់ ភាគីខាងរ៉ឺម៉កម៉ូតូស្លាប់ភ្លាមៗ ព្រមទាំងមនុស្សប្រុស២នាក់ និងក្មេងស្រីម្នាក់ រងរបួសធ្ងន់ ត្រូវបានរថយន្តសាមុយដឹកបញ្ចូនទៅកាន់មន្ទីពេទ្យភ្លាមៗ ។ ដោយឡែករថយន្តបង្ក និងរ៉ឺម៉កម៉ូតូសណ្ដោង ព្រមទាំងកង់បីឥណ្ឌា បានរងការខូចខាតយ៉ាងដំណំ ។
ម្ចាស់រថយន្តបង្កបានរងរបួសស្រាល បានចុះគេចខ្លួនបាត់ស្រមោល បន្សល់ទុករថយន្ត ហើយសមត្ថកិច្ចបានយកទាំងរ៉ឺម៉កម៉ូតូ និងកង់បីឥណ្ឌាទៅរក្សាទុកនៅការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ។ រីឯសពស្ត្រីជនរងគ្រោះប្រគល់ឲ្យក្រុមគ្រួសារធ្វើបុណ្យតាមប្រពៃណី ៕ ភារ៉ា ដង្កោ
