សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសជនជាតិចិនម្នាក់ បើករថយន្តស៊េរីទំនើបបង្កគ្រោះថ្នាក់ចរាចរ បុក រ៉ឺម៉កកង់បី ឥណ្ឌាក្រឡាប់ បណ្ដាលឲ្យរងរបួសធ្ងន់ម្នាក់ បញ្ជូនទៅមន្ទីរពេទ្យភ្លាមៗ ។
ហេតុការណ៍នេះ កើតឡើងកាលពីម៉ោង ០១និង៣០នាទីរសៀល ថ្ងៃទី៣ ខែមិថុនា ឆ្នាំ២០១៩ ស្ថិតតាមបណ្តោយមហាវិថីព្រះនរោត្តម កែងផ្លូវលេខ១៥៤ ចំណុចស្តុបរោង កុនលុច្សក្នុងសង្កាត់ផ្សារថ្មី៣ ខណ្ឌដូនពេញ រាជធានីភ្នំពេញ ។
ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញបុរសម្នាក់ និង ស្ត្រីម្នាក់បានបើករ៉ឺម៉កកង់បី ឥណ្ឌា ពណ៌ក្រហម ពាក់ស្លាកលេខ ព្រៃវែង ១M-១៥៧៤ ធ្វើដំណើតាមបណ្ដោយមហាវិថីព្រះនរោត្តម ទិសដៅពីកើតទៅលិច បានឈប់រងចាំស្តុប ខណៈពេលនោះក៏ស្រាប់តែមាន រថយន្តមួយគ្រឿងម៉ាក ឡិចស៊ីស RX350 ពណ៌ខ្មៅ ពាក់ស្លាកលេខ ២AW-៤៣៣២ បើកបរដោយបុរសជនជាតិម្នាក់ បានធ្វើដំណើរមកពីក្រោយបុកពេញទំហឹង អូសរ៉ឺម៉កកង់បីជាច្រើនម៉ែត្របណ្ដាលឲ្យក្រឡាប់រងរបួសធ្ងន់ ត្រូវបានបញ្ជូនទៅមន្ទីរពេទ្យភ្លាមៗ ហើយរថយន្តបង្កបានព្យាយាមបើករត់គេចរហូតដល់ផ្សារតាប៉ាង ផ្លូវលេខ១៣៦ ទើបត្រូវបានប្រជាពលរដ្ឋដេញឃាត់បានតែម្តង និង វ៉ៃម្នាក់មួយដៃមួយទើបបណ្ដាលឲ្យរងរបួសបែកមាត់។
ជាក់ស្ដែងនៅពេលដែលសមត្ថកិច្ចបាននាំខ្លួនជនបង្ក ដែលជាជនជាតិចិន បើករថយន្តម៉ាក lexus RX350 ពណ៌ខ្មៅ តែពាក់ស្លាកលេខក្លែងក្លាយ នោះមកដល់អធិការដ្ឋាននគរបាលខណ្ឌដូនពេញ និងបានឆែកឆេរហើយប្រទះឃើញគ្រឿងញៀនមួយកាតាបប្រមាណជាង 10គីឡូក្រាម បន្ទាប់ពីឃើញគ្រឿងញៀនជាច្រើនគីឡូក្រាម ភ្លាមៗនោះ លោក ទៀង ចាន់សារ អធិការខណ្ឌដូនពេញ បានហាមអ្នកសាព័ត៌មានថតយករូបភាព និងបណ្តេញអ្នកព័ត៌មានចេញមកឈរចាំក្រៅរបង ដោយប្រើសំដីមិនសមរម្យ ហាក់បីដូចជាមានលាក់លៀម ។
ដោយករណីឆែកឃើញគ្រឿងញៀននេះ គឺនៅក្នុងករណីគ្រោះថ្នាក់ចរាចរ និងឈានដល់ឃាត់ឆែកឆេរឃើញគ្រឿងញៀនដោយចៃដន្យ ជាង១០គីឡូក្រាម នេះដោយសារតែជនជាតិចិនបើកបររថយន្តឡិចស៊ីស RX 350 ស្លាកលេខក្លែងក្លាយ ហើយរថយន្តទំនងជាអត់ពន្ធ បើសិនជាជនជាតិចិនមិនបង្កគ្រោះថ្នាក់ចរាចរទេ គ្រឿងញៀនជាច្រើនគីឡូក្រាមនេះ ក៏មិនអាចឃាត់បានដែរ ហើយមិនដឹងថាគ្រឿងញៀនទាំងអស់នេះ នឹងចរាចរណ៍ដល់ទីណានោះទេ សូម្បីតែជនជាតិចិនបើករថយន្តស្លាកលេខក្លែងក្លាយ គ្មានបាកូត គ្មានទាំងប័ណ្ណ បើបរ បើកពេញផ្លូវទៅហើយ ៕ ជ្រោយពេជ្រ
