ស្រវឹងបើករថយន្ត RANGE ROVER បុកម៉ូតូរទេះលក់បបរពីក្រោយ រងរបួសធ្ងន់ម្នាក់

ភ្នំពេញ ៖ រថយន្ត RANGE ROVER អ្នកបើកបរស្រវឹងជោកទាំងថ្ងៃ បើកបោះពួយលឿនជ្រុលទៅបុកម៉ូតូរទេះលក់បបរ ពីក្រោយពេញទំហឹង រុញទៅប៉ះរថយន្តកូរ៉េមួយគ្រឿងផ្សេងទៀត ខ្ទេចទាំងរថយន្ត ទាំងរទេះបបរ បណ្តាលឲ្យយុវជនម្នាក់រងរបួសធ្ងន់ ចំណែកស្ត្រីម្នាក់ទៀតមិនមានរងរបួស ។

ហេតុការណ៍​នេះ បានកើតឡើងកាលពីវេលាម៉ោង៤រសៀល ថ្ងៃទី០៤ ខែមិថុនា ឆ្នាំ២០១៩ ស្ថិតនៅតាមបណ្តោយផ្លូវជាតិលេខ៣ មុខហាងម៉ូឌែនសុីធី ភូមិព្រៃព្រីងត្បូង១ សង្កាត់ចោមចៅ២ ខណ្ឌពោធិសែនជ័យ ។

ជនរងគ្រោះឈ្មោះ ផាង សុផាត អាយុ១៧ឆ្នាំ មានស្រុកកំណើត ស្រុករំដួល ខេត្តស្វាយរៀង ។

តាមប្រភពនៅកន្លែងកើតហេតុ បានឲ្យដឹងថា មុនកើតហេតុ ម៉ូតូរទេះលក់បបរ ជិះ២នាក់មីងក្មួយ បើកដើរលក់បបរ តាមផ្លូវ ពីត្បូងទៅជើង លុះដល់ចំណុចកើតហេតុ ស្រាប់តែរថយន្តបង្កម៉ាក RANGE ROVER ពណ៌ក្រហម ពាក់ស្លាកលេខ ភ្នំពេញ 2AM-5996 បើកបរដោយបុរសម្នាក់ស្រវឹងស្រាជោកជាំក្នុង ល្បឿនលឿន ស្របទិស រេចង្កូតទៅបុក ពីក្រោយ ម៉ូតូរទេះបបររបស់ជនរងគ្រោះ រុញទៅបះ នឹងរថយន្តកូរ៉េមួយគ្រឿងទៀត បើកនៅខាងមុខ បណ្តាលឲ្យរងរបួស យុវជនម្នាក់ជាអ្នកបើកបរម៉ូតូ របួសធ្ងន់បាក់ជើងស្តាំ។

ចំណែកម្តាយមីង មិនមានរងរបួស រីឯរថយន្តកូរ៉េមួយគ្រឿង ដែលម៉ូតូប៉ះនោះ បានបើកទៅបាត់ សល់តែរថយន្តបង្ក និងអ្នកបើកបរនៅកន្លែងកើតហេតុ ។

ក្រោយកើតហេតុ ជនរងគ្រោះត្រូវបាន រថយន្តសង្គ្រោះរបស់អង្គភាព៧១១ ដឹកបញ្ជូនទៅមន្ទីរពេទ្យព្រះកុសុមៈ ចំណែក រថយន្តបង្ក ម៉ូតូអូសរទេះរងខូចខាត បាក់បែកខ្ទេច រួមទាំងអ្នកបើកបររថយន្តបង្កផង សមត្ថកិច្ចចុះទៅពិនិត្យ វាស់វែងរួច យកទៅផ្នែកជំនាញ កសាងសំណុំរឿងតាមនីតិវិធី ៕ សុខាសែនជ័យ​