សមត្ថកិច្ច ឃាត់ខ្លួនជនជាតិវៀតណាមម្នាក់ ក្នុងករណីចោរកម្ម នៅ ក្រុងបាវិត

ខេត្តស្វាយរៀង៖ សមត្ថកិច្ចនគរបាល ក្រុងបាវិត សហការជាមួយកម្លាំងប៉ុស្តិ៍រដ្ឋបាលបាវិតបានឃាត់ខ្លួន ជនសង្ស័យជនជាតិវៀតណាមម្នាក់ កាលពីវេលាម៉ោង៦ព្រឹក ស្ថិតក្នុងភូមិបាវិតកណ្ដាល សង្កាត់បាវិត ក្រុងបាវិត ខេត្តស្វាយរៀង ពាក់ពន្ធ័ករណីលួចម៉ូតូអ្នកភូមិ ។

ហេតុការណ៍បាត់ម៉ូតូនេះ កើតឡើងកាលពីវេលាម៉ោង៥ និង១០នាទីព្រឹក ថ្ងៃទី២៤ ខែមិថុនា ឆ្នាំ២០១៩នៅចំណុចភូមិអង្គសាលា សង្កាត់ព្រៃអង្គុញ ក្រុងបាវិត ខេត្តស្វាយរៀង ។

បើតាមសមត្ថកិច្ចនគរបាល ក្រុងបាវិតបានឲ្យដឹងថា ជនសង្ស័យមាន ឈ្មោះ ម៉ាយ កុងទឹងអាង (MAI CONG TUAN ANH) ភេទប្រុស អាយុ២៤ ឆ្នាំ ជនជាតិវៀតណាម មុខរបរមិនពិតប្រាកដ មានទីលំនៅភូមិចាំវាំងហាយ ឃុំកូយ៉ូវ ស្រុកកូយ៉ូវ ខេត្តតៃនិញ ប្រទេសវៀតណាម ។

ចំណែកម្ចាស់ម៉ូតូរងគ្រោះមាន ឈ្មោះ សេក ភ័ត្រ្តា ភេទប្រុស អាយុ៣៥ ឆ្នាំ ជនជាតិខ្មែរ មុខរបរកសិករ មានទីលំនៅភូមិអង្គរសាលា សង្កាត់ព្រៃអង្គុញ ក្រុងបាវិត ខេត្តស្វាយរៀង ។ ម៉ូតូដែលត្រូវជនសង្ស័យលួចនោះម៉ាកយ៉ាម៉ូហា ស៊ីរូសSIRIUS ពណ៌ក្រហម លាយខ្មៅ ពាក់ស្លាកលេខ វៀតណាម ៦២-P១៤៥២.៣ ។

បើតាមពាក្យបណ្ដឹងថា កាលពីវេលាម៉ោង៥ និង១០នាទីទៀបភ្លឺ ថ្ងៃទី២៤ ខែមិថុនា ឆ្នាំ២០១៩ នៅផ្ទះរបស់គាត់ ក្នុងភូមិអង្គរសាលា សង្កាត់ព្រៃអង្គុញ ក្រុងបាវិត ខេ្តស្វាយរៀង បានត្រូវជនសង្ស័យបានកាច់កម៉ូតូជិះយកទៅបាត់ ទើបបង្កការភ្ញាក់ផ្អើល និងបានដាក់ពាក្យបណ្ដឹងដល់សមត្ថកិច្ចនគរបាល ក្រុងសហការជាមួយនគរបាលប៉ុស្តិ៍រដ្ឋបាល រហូតមកដល់វេលាម៉ោង៦ព្រឹក ថ្ងៃដដែល ក៏ឈានទៅរកការឃាត់ខ្លួនបានតែម្ដង ។

បច្ចុប្បន្ន ជនសង្ស័យត្រូវបានសមត្ថកិច្ចនគរបាលឃាត់ខ្លួនជាបណ្តោះអាសន្ននៅអធិការដ្ឋាននគរបាល ក្រុងបាវិត ដើម្បីបំពេញសំណុំរឿងបញ្ជូនទៅស្នងការដ្ឋាននគរបាល ខេត្តចាត់ការបន្តតាមច្បាប់ ៕ យឹម សុថាន