សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ អតីតតារាកំប្លែងនាយ តាក់ស៊ី ដែលមានបំណងសាងផ្នួស និងបម្រើក្នុងវិស័យព្រះពុទ្ធសាសនាជារៀងរហូតនោះ បានសម្រេចបំណងដោយបានបួសជាផ្លូវការហើយ កាលពីព្រឹកថ្ងៃទី២៤ ខែមិថុនា ឆ្នាំ២០១៩ នៅវត្តមួយនៃ ខេត្តកំពង់ស្ពឺ ។ ការបួសនេះ នឹងបំពេញបំណងរបស់អតីតសិល្បករល្បីឈ្មោះរូបនេះក្រោយពីលោកបានសម្រាកព្យាបាលជំងឺមួយរយៈពេលខ្លីមក ។
យោងតាមគណនីយហ្វេសប៊ុករបស់នាង ភីម ដែលជាអតីតភរិយាបានបង្ហាញសារ និងរូបភាព សាងផ្នួសជាផ្លូវការហើយ ដោយមានវត្តមានអ្នកផលិតកម្មវិធី លោក សុវណ្ណ រិទ្ធី ហៅលោកតាវិចទ័រ តារាកំប្លែងរួមក្រុម នាងអ៊ីត នាយចឺម នាយគ្រឺន និងសាច់ញាតិមិត្តភ័ក្កិមួយចំនួនទៀត ។ កម្មវិធីបួសនេះ ត្រូវធ្វើឡើងនៅវត្តដងទង់ ស្រុកថ្ពង ខេត្តកំពង់ស្ពឺ ។
កន្លងមក អតីតតារាកំប្លែង នាយ តាក់ស៊ី ធ្លាប់បានប្រកាសថា នឹងថ្វាយខ្លួនជូនព្រះពុទ្ធ ព្រះធម៌ ព្រះសង្ឃ បើសិនខ្លួនបានជាពីជំងឺដោយមិនស្ដាយអ្វីទាំងអស់ ហើយគាត់ ក៏នឹងបើកផ្លូវឲ្យប្រពន្ធ គឺនាង ភីម ចង់មានគ្រួសារថ្មីគាត់ក៏មិនហាមដែរ ព្រោះខ្លួនគាត់ថ្វាយជូនព្រះទៅរហូតហើយដែរ ។
គួរបញ្ជាក់ថា នាយតាក់ស៊ី ធ្លាប់ឆ្លងកាត់ជីវិតជាក្មេងកំព្រាឪពុក ដើររើសអេតចាយ តែនាយខំតស៊ូ រហូតបានក្លាយជាតារាកំប្លែងល្បី ឈ្មោះ បន្ទាប់ពីបានប្រឡងជាប់ទាំងពីរនាក់ប្តីប្រពន្ធ ក្នុងក្រុមកំប្លែង CTN នៅ ឆ្នាំ២០០៩-២០១០ ហើយក៏បានដូរ ឈ្មោះ ពី មុល សារឿន មកនាយតាក់ស៊ី ឯភរិយាប្តូរ ឈ្មោះ ពី សុភាន់ មកជានាង ភីម ។ នាយតាក់ស៊ី មានស្រុកកំណើតនៅភូមិវត្តរំដួល ស្រុកសង្កែ ខេត្តបាត់ដំបង បច្ចុប្បន្ន រស់នៅភូមិវត្តកណ្តាល ឃុំទឹកវិល ស្រុកស្អាង ខេត្តកណ្តាល ដែលជាស្រុកកំណើតភរិយា ។ នាយបានរៀបការនៅ ឆ្នាំ២០០៦ សព្វថ្ងៃមានកូនប្រុសម្នាក់ផងដែរ ៕ វឌ្ឍនា
