សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង៖ បុរសម្នាក់ ត្រូវបានគេប្រទះឃើញដេកស្លាប់ នៅក្បែរផ្លូវលំ នៅចំណុចជ្រៃគោក ស្ថិតក្នុងភូមិត្រពាំងក្រវ៉ាន់ ឃុំព្រៃមូល ស្រុករលាប្អៀរ ខេត្តកំពង់ឆ្នាំង នៅវេលាម៉ោង១១ និង៣០នាទី ថ្ងៃទី២ ខែកក្កដា ឆ្នាំ២០១៩ ។
សមត្ថកិច្ចបានឲ្យដឹងថា ជនរងគ្រោះ ឈ្មោះ ប៊ុន លៀងគីម ភេទប្រុស អាយុ ២៨ឆ្នាំ រស់នៅភូមិត្រពាំងក្រវ៉ាន់ ឃុំព្រៃមូល ស្រុករលាប្អៀរ ខេត្តកំពង់ឆ្នាំង ។ ជនរងគ្រោះបានទៅទាក់សត្វគ្រួចអ៊ឺត នៅចំណុចជ្រៃគោក ស្ថិតក្នុងត្រពាំងក្រវ៉ាន់ ឃុំព្រៃមូល ដោយយកកាំភ្លើងកែឆ្នៃបាញ់ដោយគ្រាប់កង់ទៅជាមួយផង ។
ឆ្លងតាមការធ្វើកោសល្យវិច័យ របស់ក្រុមបចេ្ចកទេសវិទ្យាសាស្ត្រ ពិនិត្យ នៅកន្លែងកើតហេតុឃើញមានថង់យាមមួយ នៅក្នុងថង់យាមនោះ មានគ្រាប់កង់ចំនួន៧៧គ្រាប់ មានស្នាមរបួសនៅលើទ្រូងរជនរងគ្រោះទំហំប៉ុនគ្រាប់កង់ និងតាមការអះអាងរបស់ក្មួយស្រី អាយុ១៦ឆ្នាំ បានឃើញជនរងគ្រោះ កាន់កាំភ្លើងកែច្នៃទៅជាមួយ ។
តាមការសន្និដ្ឋានរបសើសមត្ថកិច្ចថា ជនរងគ្រោះស្លាប់ដោយរាលកៃកាំភ្លើងកែច្នៃ ត្រូវចំដើមទ្រូងខ្លួនឯង ៕ ចន្ថា
