សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានឆ្លើយសារភាពថា ខ្លួនពិតជាបានធ្វើសកម្មភាពកាច់កម៉ូតូរបស់ប្រជាពលរដ្ឋ ដែលចតទុកចោលពិតប្រាកដមែន ដោយសារតែខ្លួនមានជីវភាពខ្វះខាត ជាពិសេសអត់លុយបង់ថ្លៃសាលាកូន ទើបសម្រេចចិត្តធ្វើសកម្មភាពបែបនេះតែម្តង ។
លោកវរសេនីយ៍ឯក ជឹម សុីថា អធិការខណ្ឌដង្កោបានឲ្យដឹងថា នៅវេលាព្រឹកថ្ងៃទី០៥ ខែកក្កដា ឆ្នាំ២០១៩ ជនសង្ស័យឈ្មោះ សុខ ឆេង ភេទប្រុស អាយុ៤៥ឆ្នាំ មុខរត់កង់បី មានស្រុកកំណើត ភូមិឈ្លោង ឃុំឈ្លោងស្រុកឈ្លោង ខេត្តក្រចេះ បានធ្វើសកម្មភាពកាច់កម៉ូតូមួយគ្រឿងម៉ាក សេ ១២៥ ពណ៌ខ្មៅ ពាក់ស្លាកលេខ ភ្នំពេញ 1HQ 2952 ដែលជនរងគ្រោះចតទុកនៅមុខផ្ទះ ស្ថិតនៅសង្កាត់ទៀន ខណ្ឌដង្កោ បានសម្រេចហើយព្យាយាមជិះគេចខ្លួន តែត្រូវកម្លាំងលោកដែលកំពុងជិះល្បាតតាមមូលដ្ឋានឃើញ ក៏ដេញតាមចាប់រហូតមកដល់ចំណុចច្រមុះជ្រូកវត្តហា ផ្លូវ៥០ម៉ែត្រ សង្កាត់ដង្កោ ខណ្ឌដង្កោ ក៏កម្លាំងរបស់លោកធាក់ផ្តួលចាប់បានជនសង្ស័យភ្លាមៗតែម្តង ។
លោកបន្តថា ក្រោយចាប់ជនសង្ស័យបានភ្លាមនោះ កម្លាំងសមត្ថកិច្ចបានដឹកជនសង្ស័យរួមទាំងវត្ថុតាង និងម៉ូតូរបស់ជនរងគ្រោះយកកាន់អធិការដ្ឋាននគរបាលខណ្ឌដង្កោ ដើម្បីសាកសួរនិងកសាងសំណុំរឿងបញ្ជូនទៅតុលាការចាត់ការតាមច្បាប់ ៕ ភារ៉ា ដង្កោ
