សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ យុវជនឈាមរាវមួយរូប ទំនងជាដាច់លុយចាយ បែកគំនិតទៅដោះខ្សែកក្មេងដែលកំពុងតែរត់លេងនៅមុខផ្ទះ ប្រុងយកទៅលក់យកលុយមកចាយ តែមិនទាន់បានលក់ផង ត្រូវក្មេងស្រែកប្រាប់ឪពុកម្តាយ និងប្តឹងឲ្យសមត្ថកិច្ចតាមចាប់ខ្លួនយកមកផ្តន្ទាទោសតាមច្បាប់ ។
ករណីនេះ កើតឡើងកាលពីវេលាម៉ោង១៧និង៣០នាទី ថ្ងៃទី៤ ខែកក្កដា ឆ្នាំ២០១៩ នៅចំណុចមុខផ្ទះជួលមួយកន្លែង ស្ថិតក្នុងភូមិផ្សារកន្ទួត ឃុំសង្កែសាទប ស្រុកឪរ៉ាល់ ខេត្តកំពង់ស្ពឺ ។
ប្រភពសមត្ថកិច្ចបានឲ្យដឹងថា មានករណីលួច កើតឡើង បង្កដោយជនសង្ស័យឈ្មោះ ស៊ី វុទ្ធី ហៅលឹប ភេទប្រុស អាយុ១៩ឆ្នាំ រស់នៅភូមិឃុំកើតហេតុខាងលើ ។
ប្រភពបន្តថា មុនពេលកើតេតុ ជនសង្ស័យបានធ្វើសកម្មភាពដោះខ្សែ ក លោហធាតុពណ៌លឿង (ផ្លាទីន) មួយខ្សែ ពីកុមារីរងគ្រោះឈ្មោះ ឡុង សារាយឆាយយ៉ាវ៉ាន់ អាយុ០២ឆ្នាំ ក្នុងខណៈដែលក្មេងស្រីរងគ្រោះ លេងជាមួយក្មេងៗ នៅមុខផ្ទះជួលនោះ ។ ក្រោយទទួលបណ្តឹងពីឪពុកម្តាយកុមាររងគ្រោះរួចមក ជនសង្ស័យ ត្រូវបានសមត្ថកិច្ចឃាត់ខ្លួនបានភ្លាមៗតែម្តង ។
នៅចំពោះមុខសមត្ថកិច្ច ជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាពដោះខ្សែកក្មេងស្រីរងគ្រោះពិតប្រាកដមែន ។
បច្ចុប្បន្ន ជនសង្ស័យត្រូវបានសមត្ថកិច្ចឃាត់ខ្លួនមកអធិការដ្ឋាននគរបាលស្រុកឱរ៉ាល់ ដើម្បីបញ្ជូនទៅកាន់ការិយាល័យជំនាញចាត់ការបន្ត ៕ សេនាស័ក្តិ
