សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ បុរសជាតៃកុងត្រាក់ទ័រម្នាក់ បាត់បង់ជីវិតអណោចអធ័ម ខណៈកំពុងបើកត្រាក់ទ័រ បានរអិលកង់រេចង្កូតធ្លាក់ចូលក្នុងប្រឡាយទឹកចិញ្ចើមផ្លូវ បណ្ដាលឲ្យត្រាក់ទ័រក្រឡាប់សង្កត់ពីលើ នៅវេលាម៉ោង១៥ និង៣០នាទី ថ្ងៃទី៥ ខែកក្កដា ឆ្នាំ២០១៩ លើលផ្លូវលំមាត់ព្រែកប៉ាងត្រើយខាងជើង ស្ថិតក្នុងភូមិព្រែកប៉ាង ឃុំកោះ ខែល ស្រុកស្អាង ។
មន្ដ្រីនគរបាលចរាចរណ៍ស្រុកស្អាងបានឲ្យដឹងថា ជនរងគ្រោះស្លាប់ឈ្មោះ រ័ត ភេទប្រុស អាយុ៣១ ឆ្នាំ មុខរបរកម្មករបើកបរត្រាក់ទ័រ មានទីលំនៅភូមិព្រែកក្រោល ឃុំព្រៃមូល ស្រុកព្រៃខ្មែរ ខេត្តកំពង់ធំ ។ ចំណែកឯម្ចាស់ត្រាក់ទ័រឈ្មោះ ចាន់ ទុន ភេទប្រុស អាយុ៥៥ ឆ្នាំ មានទីលំនៅភូមិព្រែកតាឡៃ ឃុំព្រែកអំបិល ស្រុកស្អាង ខេត្តកណ្ដាល ។
ប្រភពដដែលបន្ដថា នៅវេលាម៉ោងកើតហេតុ ជនរងគ្រោះបានបើកត្រាក់តាមផ្លូវលំមាត់ព្រែកប៉ាងត្រើយខាងកើត ក្នុងគោលបំណងទៅភ្ជួរដីឲ្យគេ ក្នុងទិសដៅពីកើតទៅលិច លុះបើកមកដល់ចំណុចកើតហេតុ ដោយស្ថានភាពផ្លូវតូច ហើយសើមព្រោះមេឃទើបនឹងភ្លៀងរួច ភ្លាមនោះក៏រអិល រេចង្កូតធ្លាក់ព្រែកក្រឡាប់ បណ្ដាលឲ្យត្រាក់ទ័រសង្កត់អ្នកបើកបរស្លាប់នៅ និងកន្លែងកើតហេតុ ។
ក្រោយពីមានហេតុការណ៍ កើតឡើង សមត្ថកិច្ចនគរបាលចរាចរណ៍ស្រុក បានចុះទៅដល់កន្លែងកើតហេតុ រួចអន្ដរាគមន៍ ពិនិត្យ រួចកសាងឯកសារយកត្រាក់ទ័រមករក្សាទុកនៅអធិការដ្ឋាននគរបាលស្រុក ដើម្បីចាត់ការតាមច្បាប់ រីឯសាកសពជនរងគ្រោះ ត្រូវបានសមត្ថកិច្ចប្រគល់ឲ្យឈ្មោះ ចាន់ ទុន ជាម្ចាស់ត្រាក់ទ័រ ចាត់ចែងដឹកយកទៅប្រគល់ឲ្យក្រុមគ្រួសារសពនៅខេត្តកំពង់ ឆ្នាំង ដើម្បីធ្វើបុណ្យតាមប្រពៃណី ៕ ស្អាងជ័យ
