សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ យ៉ាងហោចបុរស ២នាក់បានបាត់បង់ជីវិត និងចំនួន ៤នាក់ផ្សេងទៀត បានរងរបួសស្រាល ធ្ងន់ ក្នុងករណីគ្រោះថ្នាក់ចរាចរណ៍ ៣លើកផ្សេងគ្នា នៅខេត្តពោធិ៍សាត់ ។
យោងតាមរបាយការណ៍នគរបាលស្រុកក្រគរឃើញថា នៅវេលាម៉ោង៨ និង០០នាទីព្រឹក ថ្ងៃទី៨ ខែកក្កដា ឆ្នាំ២០១៩ នៅលើកំណាត់ផ្លូវថ្នល់ជាតិលេខ៥ ស្ថិតក្នុងភូមិត្រពាំងកន្ទួត ឃុំបឹងកន្ទួត ស្រុកក្រគរ មានករណីគ្រោះថ្នាក់ចរាចរណ៍មួយបានកើតឡើង ដោយអ្នកបើកបររថយន្ត ពណ៌ត្រេអុី បុកអ្នកជិះម៉ូតូឆ្លងផ្លូវ បណ្ដាលឲ្យភាគីខាងម៉ូតូរងរបួសធ្ងន់ទាំងអ្នកបើកបរម៉ូតូ និងអ្នករួមដំណើរ ចំណែកអ្នកបើកបររថយន្តបង្កបន្សល់នៅតែរថយន្តប៉ុណ្ណោះ ។
ដោយឡែក៖ នគរបាលក្រុងពោធិ៍សាត់ឯនេះវិញដែរបានឲ្យដឹងដែរថា នៅវេលាម៉ោង១២ និង០០នាទីថ្ងៃត្រង់ ថ្ងៃដដែល នៅលើកំណាត់ផ្លូវថ្នល់មួយខ្សែ ស្ថិតក្នុងភូមិវត្តលួង សង្កាត់លលកស ក្រុងពោធិ៍សាត់ មានករណីគ្រោះថ្នាក់ចរាចរណ៍មួយបានកើតឡើងផងដែរ បង្កឡើងដោយអ្នកបើកបររថយន្តធុនធំ ១គ្រឿង បើកជែងជ្រុលបុកអ្នកបើកបរគោយន្តកន្រ្តៃដឹកផលអនុផលព្រៃឈើ ដែលកំពុងធ្វើដំណើរច្រាសទិសគ្នាពេញទំហឹង បណ្ដាលឲ្យធ្លាក់ទៅចិញ្ចើមផ្លូវថ្នល់ទាំងគោយន្តទាំងរថយន្ត បណ្ដាលឲ្យភាគីគោយន្តស្លាប់ ១នាក់ របួសស្រាលអ្នករួមដំណើរចំនួន ២នាក់ ។
ប្រភពដដែលបន្តទៀតថា លុះនៅវេលាម៉ោង៩ និង០០នាទីយប់ ថ្ងៃដដែល នៅលើកំណាត់ផ្លូវថ្នល់ជាតិលេខ៥ ស្ថិតក្នុងភូមិស្រះស្រង់ សង្កាត់ព្រៃញី ក្រុង. ខេត្តពោធិ៍សាត់ មានករណីគ្រោះថ្នាក់ចរាចរណ៍ម្ដងទៀតផងដែរ បង្កឡើងដោយអ្នកបើកបររថយន្តមិនស្គាល់ម៉ាក ១គ្រឿង(គេចបាត់) បានជ្រុលបុកអ្នកជិះម៉ូតូបណ្ដាលឲ្យស្លាប់ នៅគ្រាដែលបញ្ជូនទៅសង្រ្គោះនៅមន្រ្ដីបង្អែក ខេត្តពោធិ៍សាត់ សាកសពសមត្ថកិច្ចសម្រេចបូជាខណៈស្វែករកសាច់ញាតិ និងអត្តសញ្ញាណពុំទាន់ឃើញ ករណីគ្រោះថ្នាក់ចរាចរណ៍ទាំងចំនួន ៣លើកផ្សេងគ្នានេះ មន្រ្ដីជំនាញកំពុងមមាញឹកបន្តនីតិវិធីនៅឡើយ ៕ បឹុម ពិន
