ស្ដ្រីម្នាក់ស្លាប់ និងបុរសម្នាក់ទៀតរងរបួសស្រាលគ្រោះថ្នាក់ចរាចរណ៍រវាង ម៉ូតូបុករថយន្ត

ខេត្តកំពង់ធំ៖ គ្រោះថ្នាក់ចរាចរណ៍រវាង ម៉ូតូបុករថយន្ត បណ្តាលឲ្យស្ដ្រីម្នាក់ស្លាប់ និងបុរសម្នាក់ទៀតរងរបួសស្រាល ខូចខាតម៉ូតូ០១គ្រឿង ។

ហេតុការណ៍នេះ បានកើតឡើងកាលពីវេលាម៉ោង១៣ និង១៥នាទី ថ្ងៃពុធ ៨រោច ខែអាសាឍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២៤ ខែកក្កដា ឆ្នាំ២០១៩ នៅលើកំណាត់ផ្លូវលំក្រាលគ្រូសក្រហម ត្រង់ចំណុចផ្លូវប្រសព្វសញ្ញាលេខបូក ភូមិរការ សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ ។

សមត្ថកិច្ចបានឲ្យដឹងថា ម៉ូតូម៉ាកហុងដា វេវ ពណ៌ខ្មៅ.ស ស្លាកលេខគ្មាន បើកបទិសដៅពីកើតទៅលិច ដោយឈ្មោះ គីន ខា ភេទប្រុស អាយុ៣៤ឆ្នាំ មុខរបរកសិករ រស់នៅភូមិ ឃុំកើតហេតុខាងលើ របួសស្រាល (ពាក់មួកសុវត្ថិភាព) បានឌុបប្រពន្ធឈ្មោះ តាក់ ឡែម អាយុ៣៣ឆ្នាំ មុខរបរកសិករ ស្លាប់នៅកន្លែងកើតហេតុ (មិនពាក់មួកសុវត្ថិភាព) ។

ចំណែករថយន្តម៉ាកហ៊ីយ៉ាន់ដាយ ពណ៌ខៀវ ក្រហម ស្លាកលេខក្រចេះ 3A.0001 ដឹកដី បើកបរទិសដៅពីជើងទៅត្បូង ដោយឈ្មោះ សៀង ភា ភេទប្រុស អាយុ៥០ឆ្នាំ មុខរបរបើកបររថយន្ត រស់នៅភូមិស្រយ៉ូវត្បូង សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ នាំខ្លួនមកកាន់ការិយាល័យនគរបាលចរាចរណ៍ផ្លូវគោកដើម្បីសួរបំភ្លឺ ។

មូលហេតុ ជាបឋមបង្កដោយអ្នកបើកបរម៉ូតូគ្មានហ្វ្រាំង និងមានល្បឿនលឿននៅចំណុចផ្លូវប្រសព្វ បានទៅបុករថយន្តចំត្រចៀកទ្វារខាងឆ្វេង បណ្តាលឲ្យម៉ូតូ ដួលហើយខ្ទាតអ្នករួមដំណើរ ចូលកង់រថយន្តខាងក្រោយ កិនស្លាប់នៅកន្លែងកើតហេតុ ។

ក្រោយកើតហេតុសមត្ថកិច្ចចរាចរណ៍បានបញ្ជូនជនរងគ្រោះទៅមន្ទីរពេទ្យ និងចុះវាស់វែងធ្វើកំណត់ហេតុរួចប្រមូលវត្ថុតាងយករក្សាទុកនៅស្នងការដ្ឋាននគរបាលខេត្តកំពង់ធំរង់ចាំការដោះស្រាយ ៕ ប៊ុនរិទ្ធី