សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បានសម្រេចចិត្តលោតពីលើអគារកម្ពស់២ជាន់បំណងសម្លាប់ខ្លួន តែមិនស្លាប់ បណ្តាលឲ្យរងរបួសបាក់ជើងទាំងសងខាងក្រោយពីឈ្លោះគ្នាជាមួយប្រពន្ធរួច ។
ហេតុការណ៍នេះ បានបង្កឲ្យភ្ញាក់ផ្អើលកាលពីវេលាម៉ោង២២និង៣០នាទី ថ្ងៃទី៣០ ខែកក្កដា ឆ្នាំ២០១៩ នៅចំណុចសំណង់ទើបសាងសង់ នៅក្នុងភូមិត្រពាំងថ្លឹង១ សង្កាត់ចោមចៅ១ ខណ្ឌពោធិ៍សែនជ័យ ។
ជនរងគ្រោះឈ្នោះ លឹម ថន ភេទប្រុស អាយុ ៣២ ឆ្នាំ មុខរបរ កម្មកររោងចក្រ ស្នាក់នៅបន្ទប់ជួល ជិតកន្លែងកើតហេតុខាងលើ ។
តាមប្រភពព័ត៌មានពីអ្នកជិតខាងបានឲ្យដឹងថា កាលពីថ្ងៃទី២៩ ខែកក្កដា ឆ្នាំ២០១៩ ជនរងគ្រោះបានឈ្លោះជាមួយប្រពន្ធ ក្រោយមកប្រពន្ធបានយកកូនចុះចោលផ្ទះបាត់ ។
សាក្សីបានបន្តថា ក្រោយពីប្រពន្ធ និងកូនចុះចោលទៅបាត់ បុរសជាប្តីតែងតែង អង្គុយផឹកស្រាតែម្នាក់ឯង រហូតដល់ម៉ោងកើតហេតុ ជនរងគ្រោះក៏សម្រេចចិត្តឡើងទៅលើអគារជាន់ទី២ ដែលកំពុងសាងសង់រួចលោតចុះមកក្រោម បំណងសម្លាប់ខ្លួន តែមិនស្លាប់បណ្តាលឲ្យបាក់ជើងទាំងសងខាង ។
ក្រោយកើតហេតុ សមត្ថកិច្ចបានចុះទៅដល់ចំណុចកើតហេតុ និងទំនាក់ទំនងទៅរថយន្តសង្គ្រោះដឹកយកទៅមន្ទីរពេទ្យភ្លាមៗ ៕ សុខាសែនជ័យ
