រថយន្តស្តារីចមួយគ្រឿង ត្រូវពលរដ្ឋប្រទះឃើញប្លុងចោលជាច្រើនថ្ងៃនៅតាមផ្លូវចុះទៅវត្តអូរត្រេះ

ខេត្តព្រះសីហនុ៖ យោងតាមប្រភពព័ត៍មានពីប្រជាពលរដ្ឋបានរាយការណ៍ប្រាប់សមត្ថកិច្ចក្រុងព្រះសីហនុ កាលពីថ្ងៃពុធ ១៥រោច ខែអាសាឌ្ឍ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី៣១ ខែកក្កដា ឆ្នាំ២០១៩ថា មានរថយន្តស្តារីចមួយគ្រឿង ឃើញចតចោលច្រើនថ្ងៃហើយ នៅតាមផ្លូវចុះទៅវត្តអូរត្រេះ ក្រុងព្រះសីហនុ ខេត្តព្រះសីហនុ ដោយមិនឃើញមានម្ចាស់ត្រលប់មកយកវិញ ទើបពួកគាត់រាយការណ៍ជូនអាជ្ញាធរមានសមត្ថកិច្ចចុះមកត្រួតពិនិត្យជាក់ស្តែង ។

រថយន្តដែលគេយកមកប្លុងចោលនោះម៉ាកស្តារីច ប្រភេទវែនប្រាំបីកៅអី ពណ៍ទឹកប្រាក់ ពាក់ស្លាកលេខភ្នំពេញ 2BB-0323 ។

យោងតាមប្រភពព័ត៌មាននៅកន្លែងកើតហេតុ បានឲ្យដឹងថា រថយន្តខាងលើនេះទំនងជាអ្នកបើកបរបើកជាន់ដីភក់បណ្ដាលឲ្យជាប់ផុងទៅមុខមិនរួច ក៏ទុករថយន្តនេះចោលហើយទៅបាត់ ។ ខ្លះទៀតនិយាយថាអាចរថយន្តនេះត្រូវគេលួចយកមកប្លុងចោល ព្រោះទុកចោលច្រើនថ្ងៃហើយមិនឃើញម្ចាស់មកយកវិញ ។

បច្ចុប្បន្នរថយន្តខាងលើនេះ ត្រូវបានកម្លាំងសមត្ថកិច្ច ស្ទួចយកមករក្សាទុកនៅស្នងការដ្ឋាននគរបាលខេត្តព្រះសីហនុ រង់ចាំធ្វើការស្រាវជ្រាវស្វែងរកម្ចាស់ ដើម្បីសួររកមូលហេតុឲ្យដឹងច្បាស់ ៕ឆ្លាមសមុទ្រ