សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ស្នូគ្រាប់កាំភ្លើងបានលាន់ឮជាច្រើនគ្រាប់ បង្កឡើងដោយបុរសម្នាក់ ករណីប៉ុនប៉ងឃាតកម្ម ដោយសារភ្លើងប្រច័ណ្ឌ នៅចំណុចតាមផ្លូវលំ ភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ នៅវេលាម៉ោង ២៣ និង៤០នាទី ថ្ងៃទី០៧ ខែសីហា ឆ្នាំ២០១៩ ។ ភ្លាមៗនោះ កម្លាំងសមត្ថកិច្ចនគរបាលប៉ុស្តិ៍រដ្ឋបាលទឹកថ្លា បានធ្វើការឃាត់ខ្លួនជនសង្ស័យបាន ជាមួយអាវុធខ្លី០១ដើម ម៉ាកK៥៩ និងរថយន្តហាយឡែនឌ័រ ពណ៍ស ១គ្រឿង នាំខ្លួនមកកាន់អធិការដ្ឋាននគរបាលខណ្ឌសែនសុខ ធ្វើកំណត់ហេតុស្តាប់ចម្លើយតាមនីតិវិធី។
សមត្ថកិច្ចបានឲ្យដឹងថា៖ ជនសង្ស័យ ឈ្មោះ ឆោម ចំណាន ភេទប្រុស អាយុ៣៩ឆ្នាំ ជនជាតិខ្មែរ មុខរបរ ជាយោធា ស្នាក់នៅភូមិសាលាដែង ឃុំឬស្សីក្រោក ស្រុកមង្គលបូរី ខេត្តបន្ទាយមានជ័យ (គ្មានសារធាតុញៀន) ។
ដោយឡែកស្ត្រីជាភរិយា និងជាជនរងគ្រោះ ឈ្មោះ ជា បតី (ជា គឹមឡាង) ភេទស្រី អាយុ៣៥ឆ្នាំ ជនជាតិខ្មែរ មុខរបរលក់ខោអាវនៅផ្សារជិនណាន ស្នាក់នៅផ្ទះគ្មានលេខ ផ្លូវបេតុង ភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ(របួសដើមដៃខាងឆ្វេង , ពោះទឹកខាងឆ្វេង , លើស្មាខាងស្តាំ , លើពោះទឹកខាងស្តាំ ) សន្លប់ស្តូកស្តឹងក្នុងថ្លុកឈាម ត្រូវបានអ្នកជិតខាងនិងសមត្ថកិច្ចដឹកយកទៅសង្គ្រោះបន្ទាន់នៅមន្ទីរពេទ្យ។
សមត្ថកិច្ចបន្តថា៖ សម្ភារៈបន្សល់ទុក ៖ អាវុធខ្លី០១ដើម ម៉ាកK59 លេខ២៤០៣ , សំបកគ្រាប់០៧គ្រាប់ , ក្បាលគ្រាប់០១គ្រាប់។
សមត្ថកិច្ចបានបញ្ជាក់ថា៖ មុនពេលកើតហេតុ ជនសង្ស័យ(ជាប្តី) បានទូរស័ព្ទហៅជនរងគ្រោះ(ជាប្រពន្ធ) មកជួបខ្លួន នៅចំណុចកើតហេតុខាងលើ ពេលជនរងគ្រោះមកដល់ ជនសង្ស័យបានដើរទៅរថយន្តរបស់ខ្លួនយកកាំភ្លើងខ្លីK59 ពីក្នុងរថយន្តអាមេបញ្ចូលគ្រាប់ បាញ់សំដៅទៅលើ និងបាញ់ភរិយា ជាជនរងគ្រោះចំនួន០៧គ្រាប់ តែត្រូវជនរងគ្រោះចំនួន០៤គ្រាប់ បណ្តាលឲ្យរងរបួសធ្ងន់ ហើយត្រូវបានបញ្ជូនព្យាបាលនៅមន្ទីរពេទ្យកាល់ម៉ែត ។ បន្ទាប់ពីធ្វើសកម្មភាពរួច ជនសង្ស័យបានឡើងបើករថយន្តគេចខ្លួន តែត្រូវកម្លាំងល្បាតរបស់អធិការដ្ឋាននគរបាលខណ្ឌសែនសុខ ទទួលដំណឹងនៃហេតុការណ៍នេះ ធ្វើការដេញតាមចាប់បានជនសង្ស័យ យកមកធ្វើការសាកសួរនៅអធិការដ្ឋាននគរបាលខណ្ឌសែនសុខ ។ បច្ចុប្បន្ន ជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីអនុវត្តតាមនិតិវិធី ៕ តុង សីហា
