សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ ប្រភពព័ត៌មានរបស់ស្នងការដ្ឋាននគរបាលខេត្ត បានឲ្យដឹងថា៖ នៅវេលាម៉ោង២៣និង៣០នាទី ថ្ងៃទី១០ ខែសីហា ឆ្នាំ២០១៩ មានជនសង្ស័យចំនួនពីរនាក់ បានជិះម៉ូតូមួយគ្រឿង ធ្វើសកម្មភាពឆក់យកទូរសព្ទ័របស់ជនបរទេស ជនជាតិចិនម្នាក់ ដែលកំពុងជិះម៉ូតូតាមផ្លូវ នៅផ្លូវសេតេ ជិតគ្លីនិកសេតេ ក្នុងភូមិ២ សង្កាត់លេខ២ ក្រុង/ខេត្តព្រះសីហនុ បណ្តាលឲ្យជនរងគ្រោះដួលរលាត់ដៃជើង រងរបួសមធ្យម ហើយពួកជនល្មើស បានឆក់យកទូរសព្ទ័ដៃ ម៉ាកi-Phone 6Plus ពណ៌មាសមួយគ្រឿងទៅបាត់។
លោកឧត្តមសេនីយ៍ត្រីកុល ផាលីស្នងការរងទទួលផែនព្រហ្មទណ្ឌ បានឲ្យដឹងថា៖ ក្រោយពេលទទួលបានដំណឹងនេះភ្លាម កម្លាំងល្បាត របស់នគរបាលព្រហ្មទណ្ឌ បានសហការគ្នា ស្រាវជ្រាវយ៉ាងយកចិត្តទុកដាក់ រហូតដល់ការចាប់ខ្លួនជនសង្ស័យបានចំនួន២នាក់៖
១.ឈ្មោះ សាវឿន ម៉េងហ៊ាង ភេទប្រុស អាយុ១៧ឆ្នាំ មានលំនៅដ្ឋាន ភូមិ៤ សង្កាត់លេខ៤ ក្រុង/ខេត្តព្រះសីហនុ មុខរបរបុគ្គលិកកាស៊ីណូ។
២.ឈ្មោះ ញិញ គង្គារ ភេទប្រុស អាយុ១៩ឆ្នាំ នៅភូមិ៤ សង្កាត់លេខ៤ ក្រុង/ខេត្តព្រះសីហនុ មុខរបរកម្មករសំណង់ ហើយចាប់យកបានវត្ថុតាងមាន ៖ ទូរស័ព្ទដៃ១គ្រឿង ម៉ាក i-Phone 6Plus ពណ៌មាស(របស់ជនរងគ្រោះ) និងម៉ូតូ១គ្រឿងម៉ាកហុងដាសេ១២៥ ឆ្នាំ២០១៧ ពាក់ស្លាកលេខៈ ព្រៃវែង 1L-8942 មធ្យោបាយជិះធ្វើសកម្មភាព។
ជនរងគ្រោះក្នុងករណីនេះ ឈ្មោះ Qiu XinWang ភេទប្រុស ជនជាតិចិន អាយុ៣២ឆ្នាំ មុខរបរអ្នកដឹកជញ្ជូនឥវ៉ាន់ មានទីលំនៅភូមិ៣ សង្កាត់លេខ៣ ក្រុង/ខេត្តព្រះសីហនុ រងរបួសរលាត់ដៃទាំងសងខាង និងជើង។
ករណីនេះ នគរបាលព្រហ្មទណ្ឌកម្រិតស្រាល កំពុងកសាងសំណុំរឿងបញ្ជូនទៅសាលាដំបូងខេត្តដើម្បីចាត់ការតាមនីតិវិធី ៕ ឆ្លាម សមុទ្រ
