ទំនងស្រវឹង និងប្រើប្រាស់ល្បឿនលឿនរេចង្កូតក្រឡាប់រថយន្តផ្ងាជើងរបួសស្រាល២នាក់

ខេត្តស្វាយរៀង៖ មានការភ្ញាក់ផ្អើលដល់អ្នកភូមិ កំពុងដេកលង់លក់ ក្នុងដំណេក ខណៈមានរថយន្តមួយគ្រឿងបានក្រឡាប់ផ្ងារជើង ទំនងអ្នកបើកបរប្រើប្រាស់ល្បឿនលឿន មិនប្រយ័ត្ន បណ្ដាលឲ្យអ្នកបើកបរ និងអ្នករួមដំណើររងរបួស ។

ហេតុការណ៍នេះបានកើតឡើងកាលពីវេលាម៉ោង១១យប់ថ្ងៃទី១៨ ខែសីហា ឆ្នាំ២០១៩ ស្ថិតនៅចំណុចផ្លូវលេខ ៣១៤D ស្ថិតនៅភូមិ អង្គតាមោគ ឃុំ ប្រសូត្រ ស្រុក ស្វាយទាប ខេត្តស្វាយរៀង ។

បើតាមសមត្ថកិច្ចនគរបាលស្រុកបានឲ្យដឹងថា បុរសទាំង២ មានឈ្មោះ មាស ឧត្ដម អាយុ២៦ឆ្នាំ មុខរបរ បុគ្គលិកអេស៊ីលីដា រស់នៅភូមិ ត្រពាំងកំពឹស ឃុំខ្សែត ស្រុក កំពង់រោទិ៍ ខេត្តស្វាយរៀងនិងអ្នករួមដំណើរឈ្មោះ សូ រីណា អាយុ៥៩ឆ្នាំ មុខរបរនគរបាល រស់នៅភូមិព្រៃវ័រ ឃុំថ្មី ស្រុកកំពង់រោទិ៍ ខេត្តស្វាយរៀង ជាម្ចាស់ រថយន្តម៉ាក ហាយឡេនឌឺ ពណ៌ទឹកមាស ពាក់ស្លាកលេខ ភ្នំពេញ 2AN 5482 ។

យោងតាមសមត្ថកិច្ចស្រុកបានឲ្យដឹងថា នៅមុនពេលកើតហេតុ ជនរងគ្រោះទាំង២នាក់ បានទៅលេងផ្ទះបងប្អូន ដោយមានការជួបជុំគ្នា និងមានពិធីហូបចុកយ៉ាងសប្បាយរីករាយ តាមលក្ខណៈគ្រួសារ ។

ក្រោយពីបញ្ចប់កម្មវិធី ជនរងគ្រោះក៏បានជិះរថយន្តមួយគ្រឿងម៉ាក ហាយឡេនឌឺ ពណ៌ទឹកមាស ពាក់ស្លាកលេខ ភ្នំពេញ 2AN 5482 ក្នុងទិសដៅពីជើងទៅត្បូង លុះមកដល់ចំណុចផ្លូវកោង ក៏បណ្តាលឲ្យរេចង្កូតក្រឡាប់ផ្ងារជើងបង្កការភ្ញាក់ផ្អើលតែម្ដង ។

សូមបញ្ជាក់ថា ករណីគ្រោះថ្នាក់ចរាចរណ៍នេះ មិនបណ្ដាលឲ្យរងគ្រោះថ្នាក់ដល់អាយុជីវិតនោះទេ គ្រាន់តែរងរបួសស្រាលតែប៉ុណ្ណោះ នេះពិតជាសំណាងហើយមិនគ្រោះថ្នាក់ដល់អ្នកដទៃ និងលំនៅឋានប្រជាពលរដ្ឋដែលនៅក្បែរនោះ ៕ យឹម សុថាន