សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប ៖ កម្លាំងនគរបាលជំនាញព្រហ្មទណ្ឌក្រុងសៀមរាប បានធ្វើការឃាត់ខ្លួនអតីតបុគ្គលិកអង្គការ ICF ម្នាក់ ពាក់ព័ន្ធនឹងករណីអំពើលួចមានស្ថានទម្ងន់ទោស គាស់ទម្លុះទម្លាយ យកទ្រព្យសម្បត្តិនៅក្នុងអង្គការ ហេតុការណ៍ចុះឃាត់ខ្លួននេះធ្វើឡើងនៅថ្ងៃទី០៣ ខែកញ្ញា ឆ្នាំ២០១៩ ចំណុចបន្ទប់ជួលភូមិស្ទឹងថ្មី សង្កាត់ស្វាយដង្គំ ក្រុងសៀមរាប ។
លោកឧត្ដមសេនីយ៍ត្រី ភឹង ចិន្តារ៉េត ស្នងការរង ទទួលផែនកណ្ដាលព្រហ្មទណ្ឌ នៃស្នងការដ្ឋានខេត្តសៀមរាបបានឲ្យដឹងថា កម្លាំងនគរបាលក្រុងសៀមរាប បានធ្វើការឃាត់ខ្លួនជនសង្ស័យម្នាក់មានឈ្មោះហែម សីហា ភេទប្រុស អាយុ១៩ឆ្នាំ ពាក់ព័ន្ធនឹងករណីអំពើលួចមានស្ថានទម្ងន់ទោស ( គាស់ទម្លុះទម្លាយ)។
លោកបន្តថា ករណីនេះកើតឡើងកាលពីថ្ងៃ១៧ ខែកក្កដា ឆ្នាំ២០១៩ ម៉ោង០៦និង៣០នាទី ព្រឹក ស្ថិតនៅចំណុច ក្នុងបរិវេណអង្គការ ICF ភូមិគ្រួស សង្កាត់ស្វាយដង្គំ ក្រុងសៀមរាប ខេត្តសៀមរាប មានករណីអំពើលួចមានស្ថានទម្ងន់ ទោស(គាស់ទម្លុះទម្លាយ) វាយបំបែកកញ្ចក់លួចយកម៉ាស៊ីនថតចំនួន០៤គ្រឿង ម៉ាក CANON ពណ៌ខ្មៅ , កែវពង្រីកសម្រាប់ប្រើជាមួយម៉ាស៊ីនថត ចំនួន០៨គ្រាប់, ថ្មម៉ាស៊ីនថត០៤គ្រាប់, យន្តហោះបញ្ជាខ្នាតតូច ប្រើសម្រាប់ថតរូបពីលើអាកាសចំនួន០១គ្រឿង ពណ៌ខ្មៅ, កាបូបសម្រាប់ដាក់ ម៉ាស៊ីនថតចំនួន០១ ពណ៌ខ្មៅ របស់ដើមបណ្តឹងឈ្មោះ ឆែម វុទ្ធី ភេទ ប្រុស អាយុ៣៣ឆ្នាំ មុខរបរជាបុគ្គលិកតំណាងឲ្យអង្គការICF មានទីលំនៅបច្ចុប្បន្ន ភូមិគ្រួស សង្កាត់ ស្វាយដង្គំ ក្រុងសៀមរាប ខេត្តសៀមរាប បង្កឡើងដោយជនសង្ស័យ មិនស្គាល់អត្តសញ្ញាណ ។
បន្ទាប់មក ក៏មានបុគ្គលិកអង្គការខាងលើ មានការសង្ស័យទៅលើជនសង្ស័យរូបនេះ មានម៉ាស៊ីនថតម៉ាក CANON ស្រដៀងទៅនឹងម៉ាស៊ីនថតដែលបាត់ ក៏បានសុំឲ្យសមត្ថកិច្ច ធ្វើការកោះហៅជនសង្ស័យរូបនេះយកមកសួរនាំ ។
ដោយមានការសំណូមពរពីខាងអង្គការ ICF នៅថ្ងៃទី០៣ ខែកញ្ញា ឆ្នាំ២០១៩ នគរបាលជំនាញក្រុងក៏បានកោះហៅជនសង្ស័យខាងលើដែលជាអតីតបុគ្គលិកអង្គការខាងលើ (ផ្នែកថតរូប) យកមកធ្វើការសួរនាំក្រោយពីការសួរនាំជនសង្ស័យបានសារភាព ថាខ្លួនពិតជាបានចូលក្នុងអង្គការហើយធ្វើសកម្មភាពវាយ ជញ្ជាំងកញ្ចក់ បន្ទប់ក្នុង អង្គការខាងលើបណ្ដាលឲ្យបែកហើយលួចយក សម្ភារៈខាងលើពិតប្រាកដមែន ដោយឡែកសម្ភារៈដែលលួចបាន ជនសង្ស័យបានលក់ដូរតាមរយៈការបង្ហោះក្នុងវឹបសាយ Khmer24 នៅក្នុងអំឡុងខែកក្កដា ឆ្នាំ២០១៩ ដោយដាក់លេខទូរស័ព្ទរបស់គេ ០៨៦ ២៥០ ៤៨១ ដោយជនសង្ស័យលក់ម៉ាស៊ីនថតចំនួន០៣គ្រឿង ម៉ាក CANON បានចំនួន១៣០០ដុល្លារ.យន្តហោះបញ្ជា(ដ្រូន)ចំនួន០១គ្រឿង បានប្រាក់៥០០ដុល្លារ.ជើងទ្រលំនឹងម៉ាស៊ីនថតចំនួន០១គ្រឿងបានប្រាក់ចំនួន១៨០ដុល្លារ.កែវពង្រីកសម្រាប់ភ្ជាប់ទៅនឹងម៉ាស៊ីនថត០៣គ្រឿងបានប្រាក់ចំនួន១៦៥០ដុល្លារ ហើយជនសង្ស័យក៏បាត់លេខអ្នកកុម្ម៉ង់ទិញផងដែរ ហើយសម្ភារៈដែលនៅសល់ជនសង្ស័យក៏បានទុកក្នុងបន្ទប់ជួល។
បន្ទាប់មក សមត្ថកិច្ច ក៏បាននាំជនសង្ស័យទៅឆែកឆេរបន្ទប់ជួល ហើយដកហូតបានវត្ថុតាងមួយចំនួន ។ បច្ចុប្បន្ន កម្លាំងនគរបាលជំនាញក្រុងសៀមរាប កំពុងរៀបចំសំណុំរឿងបញ្ជូនខ្លួនជនសង្ស័យខាងលើទៅតុលាការ ដើម្បីចាត់ការតាមផ្លូវច្បាប់៕ ប៊ុនរិទ្ធី
