សារព័ត៌មាន នគរវត្ត តែងតែនាំមុខគេជានិច្ច
គ្រប់ខ្សែផ្លូវឆ្លងកាត់ខេត្តកំពង់ធំ ត្រូវបានរៀបចំកម្លាំងនគរបាលប្រមូលសេដ្ឋកិច្ចជូនលោកឧត្តមសេនីយ៍ទោ អ៊ុក កុសល យ៉ាងម៉ត់ចត់ ដោយមិនអនុញ្ញាតឲ្យឈ្មួញរកស៊ីដឹកជញ្ជូនទំនិញ, កសិផល, ជ្រូក មាន់ ទា… រួចផុតពីកម្លាំងរបស់លោកស្នងការនោះឡើយ ។ ប្រភពរាយការណ៍ថា លោកស្នងការនគរបាលខេត្តកំពង់ធំបានចាត់តាំងកម្លាំងមន្ត្រីក្រោមឱវាទមួយចំនួនដែលជាបក្ខពួករបស់ខ្លួនឈរតាមផ្លូវជាតិ ដើម្បីចាំប្រមូលលុយពីការដឹកជញ្ជូន, ចរាចរទំនិញ ដូចជាត្រីសាច់ជាដើម ។ ពួកគេពង្រាយកម្លាំងចាំដេញតាមរថយន្តដឹកទំនិញ ឬរថយន្តដឹកបទល្មើសផ្សេងៗ ដោយមិនឲ្យរួចមួយរថយន្តណាឡើយ ។ ក្រោមបទបញ្ជារបស់លោកស្នងការ ក្រុមមន្ត្រីអ្នកចុះប្រមូលសេដ្ឋកិច្ចទាំងនោះ មិនខ្លាចនឹងការបង្គាប់ទារលុយ ពីពួកឈ្មួញរកស៊ីដឹកទំនិញឆ្លងកាត់ភូមិសាស្ត្រខេត្តកំពង់ធំនោះឡើយ ។
ក្រុមមន្ត្រីដែលត្រូវបានពង្រាយនៅតាមផ្លូវជាតិ មានដូចជាលោកវរៈសេនីយ៍ត្រី ឌី ប៊ុនលី, លោកវរៈសេនីយ៍ ហួរ គឹមហ័ត នាយរងការិយាល័យសេដ្ឋកិច្ច និងលោកអនុសេនីយ៍ឯកជ័យ ចាន់គង់ នាយផ្នែកនៃការិយាល័យសេដ្ឋកិច្ច… ដែលពួកគេកំពុងធ្វើសកម្មភាពយ៉ាងអនាធិបតេយ្យនៅក្នុងគ្រប់ស្រុក-ក្រុង ទាំងដែនគោក និងបឹងទន្លេសាប ។ ពួកមន្ត្រីទាំងនេះធ្វើសកម្មភាពក្នុងដែនសមត្ថកិច្ចខេត្តកំពង់ធំ ពោលគឺនៅលើផ្លូវជាតិលេខ៦ ពីព្រំប្រទល់ខេត្តកំពង់ចាម ដល់ខេត្តសៀមរាបមានចម្ងាយ១៤១គីឡូម៉ែត្រ និងផ្លូវជាតិលេខ៧១ ពីទីប្រជុំជនកំពង់ថ្ម ក្នុងស្រុកបារាយណ៍ ដល់ព្រំប្រទល់ស្រុកចំការលើ ខេត្តកំពង់ចាម ដែលមានចម្ងាយ១៥គីឡូម៉ែត្រ ។ ក្រៅពីនេះ ពួកគេក៏ធ្វើសកម្មភាពនៅលើផ្លូវជាតិលេខ៦២ ពីទីរួមខេត្តកំពង់ធំដល់ព្រំប្រទល់ស្រុករវៀង ខេត្តព្រះវិហារដែលមានចម្ងាយ៣៨គីឡូម៉ែត្រ ។ ពួកគេធ្វើសកម្មភាពដេញចាប់ ឃាត់រថយន្តទាំងយប់ទាំងថ្ងៃ ប្រសិនបើមិនបង់ប្រាក់ឲ្យទេនោះ ។ ចំពោះឈ្មួញដែលស្គាល់ពួកមន្ត្រីនគរបាលទាំងនេះច្បាស់ គឺត្រូវទាក់ទងតាមទូរស័ព្ទជាមុនរួចទើបចាត់ចែងសេវាជាក្រោយ ។
គេរាយការណ៍ថា ពួកគេប្រើប្រាស់រថយន្ត៣គ្រឿង ដែលមានរថយន្តកាមរីពណ៌ស្លែ, រថយន្តឡង់រ៉ូវើ ពណ៌កណ្តុរប្រមេះ និងរថយន្តហ្វ័ត ។ សកម្មភាពនិងទង្វើបែបនេះ ពួកគេមិនខ្វល់អំពីបញ្ហាដែលកើតឡើងដូចជាបង្កឲ្យមានគ្រោះថ្នាក់ចរាចរណ៍អ្វីនោះឡើយ ។ និយាយអំពីផ្លូវច្បាប់ ពួកគេមិនគោរពបទបញ្ជារបស់ប្រមុខរាជរដ្ឋាភិបាល និងមិនស្តាប់តាមគោលការណ៍ណែនាំរបស់អគ្គស្នងការនគរបាលជាតិនោះទេ ។ ជារឿយៗ តាំងតែពីឡើងកាន់តំណែងជាស្នងការនគរបាលខេត្តកំពង់ធំ លោកអ៊ុក កុសល បង្ករឿងអាស្រូវជាច្រើន ជាពិសេសពាក់ព័ន្ធនឹងបញ្ហាបទល្មើសេដ្ឋកិច្ច ។ គេរំពឹងថា លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ មិនបណ្តោយឲ្យបញ្ហាទាំងនេះនៅបន្តរីករាលដាលនៅឯស្នងការនគរបាលខេត្តកំពង់ធំតទៅទៀតឡើយ ពោលគឺត្រូវវះកាត់ រឿងរ៉ាវទាំងនេះផ្តល់ទំនុកចិត្តជូនប្រមុខដឹកនាំនៃរាជរដ្ឋាភិបាលកម្ពុជាផង ៕
