សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសជាកូនប្រសាម្នាក់បានរងរបួស ខណៈត្រូវឪពុកក្មេកទាញបានដាវសាំម៉ូរៃដេញកាប់បន្ទាប់ពីមានជម្លោះជាមួយប្រពន្ធយ៉ាងខ្លាំងកាលពីវេលាម៉ោង១០:និង៤០នាទីយប់ ថ្ងៃទី២០ ខែកញ្ញា ឆ្នាំ២០១៩ នៅចំណុចភូមិដំណាក់កន្ទូត ឃុំស្វាយយា ស្រុកស្វាយជ្រំ ខេត្តស្វាយរៀង ។
បើយោងតាមសមត្ថកិច្ចមូលដ្ឋានស្រុកបានឲ្យដឹងថា បុរសរងរបួសជាកូនប្រសាមានឈ្មោះ ប៉ែន សុខ អាយុ ២៨ឆ្នាំ ជនជាតិខ្មែរ មុខរបរតម្បាញក្រមា មានទីលំនៅភូមិដំណាក់កន្ទូត ឃុំស្វាយយា ស្រុកស្វាយជ្រំ ខេត្តស្វាយរៀង ។
ចំណែកឪពុកជាជនសង្ស័យមានឈ្មោះ យស់ ខេន អាយុ ៥៤ឆ្នាំ ជនជាតិខ្មែរ មុខរបរធ្វើស្រែរស់ ក្នុងភូមិឃុំ ជាមួយគ្នា ក្រោយបង្កហេតុបានរត់គេចខ្លួនភ្លាមៗ ។
ប្រភពបន្តថា កូនប្រសារងគ្រោះត្រូវមួយដាវសាំម៉ូរៃចំកញ្ចឹងក ផ្នែកខាងឆ្វេង បណ្តបណ្តាលឲ្យរងរបួសដោយដើមហេតុបង្កឲ្យមានប្រើហិង្សានេះដោយសារតែជនរងគ្រោះទើបមកពីភ្នំពេញហើយឈ្លោះប្រកែកគ្នាជាមួយប្រពន្ធ ខណៈនោះឪពុកក្មេក ក៏បានបោះពាក្យសម្តីថា បើចុះចេញពីផ្ទះហើយកុំមកវិញធ្វើអី រហូតដល់មានការប្រតាយប្រតប់គ្នារវាងឪក្មេក និងកូនប្រសាតែម្ដង ។
ក្រោយមក ជនរងគ្រោះត្រូវបានបញ្ជូនទៅព្យាបាលនៅមន្ទីរពេទ្យខេត្តស្វាយរៀភ្លាមៗផងដែរ ។
បច្ចុប្បន្នសមត្ថកិច្ចកំពុងស្រាវជ្រាវរកវត្ថុតាង និងជនសង្ស័យ ៕ យឹមសុថាន
