សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនជាតិចិន២ក្រុម ឈ្លោះប្រកែកគ្នា រហូតឈានដល់ ផ្ទុះអាវុធជាច្រើនគ្រាប់ ក្នុងភោជនីយដ្ឋានមួយកន្លែង បណ្ដាលឲ្យ បែកកញ្ចក់ទ្វារ ចេញចូល និង កញ្ចក់បន្ទប់ បង្កឲ្យមានការភ្ញាក់ផ្អើលដល់កម្លាំងសមត្ថកិច្ចចុះអន្តរាគមន៍ ។
ហេតុការណ៍នេះកើតឡើងកាលពីម៉ោង៧និង៤០នាទីយប់ ថ្ងៃទី២៧ ខែកញ្ញា ឆ្នាំ២០១៩ នៅចំណុចក្នុងភោជនីយដ្ឋាន និង កាហ្វេ យីហោ «ហ្គ្រីន កាហ្វេ» ផ្ទះលេខ១៦៦ ផ្លូវលេខ១៥០ ក្រុមទី៨ ភូមិ៣ សង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ។
ប្រភពព័ត៌មានពីសមត្ថកិច្ចបានឲ្យដឹងថា នៅមុនពេលកើតហេតុគឺមានជនជាតិចិន២ក្រុម ប្រើប្រាស់អាវុធខ្លីចំនួន០១ដើម មិនស្គាល់ម៉ាក បាន ជិះរថយន្តមួយគ្រឿង ម៉ាក តូយូតា ហាយឡែនឌ័រ ពណ៌ទឹកប្រាក់ មិនចាំស្លាកលេខ ដោយមើលរូបភាពមិនច្បាស់(កាមេរ៉ាសុវត្ថិភាព) និង បានរកឃើញវត្ថុតាងរួមមានៈ សំបកគ្រាប់កាំភ្លើងខ្លីបាញ់រួចចំនួន៣គ្រាប់ មិនស្គាល់ម៉ាក ។ ចំណែក ជនរងគ្រោះមិនបានស្គាល់អត្តសញ្ញាណនោះទេ ថែមទាំងមិនមកដាក់ពាក្យប្តឹង បានគេចខ្លួនបាត់។
បន្ទាប់ពីកើតហេតុ កម្លាំងផ្នែកព្រហ្មទណ្ឌ និងកម្លាំងនគរបាលប៉ុស្តិ៍ទឹកល្អក់ទី២ នៃអធិការដ្ឋាននគរបាលខណ្ឌទួលគោក បានចុះពិនិត្យដល់កន្លែងកើតហេតុ បំភ្លឺសាក្សីដឹងរឿងហេតុ និង ឆែកកាមេរ៉ាសុវត្ថិភាពនៅកន្លែងកើតហេតុ ដើម្បីកំណត់មុខសញ្ញាធ្វើសកម្មភាព ដើម្បីឈានដល់ការឃាត់ខ្លួនជនបង្ក យកមកផន្ទាទោសតាមផ្លូវច្បាប់ ៕ ជ្រោយពេជ្រ
