ក្រុមចោរកំពុងរាលល្បាត លួចម៉ូតូពលរដ្ឋនៅខណ្ឌដូនពេញ យ៉ាងសកម្ម

ភ្នំពេញ៖ មួយរយៈពេលថ្មីៗនេះ គេឃើញថាក្រុមចោរជំនាញខាងកាច់ក.ម៉ូតូ បានធ្វើសកម្មភាពយ៉ាងសកម្មក្នុងខណ្ឌដូនពេញ ដោយមន្ត្រីប៉ុស្តិ៍រដ្ឋបាលមួយចំនួនដូចជាអសកម្មក្នុងការបង្ក្រាបបទល្មើសលួច ឆក់ នេះណាស់ ។

យោងតាមប្រភពព័ត៍មានពីប្រជាពលរដ្ឋ បានលើកឡើងថា ជាក់ស្តែងកាលពីយប់ថ្ងៃទី៧ ខែតុលា ឆ្នាំ២០១៩ នៅតាមបណ្ដោយផ្លូវលេខ៣ សង្កាត់ជ័យជំនៈ ខណ្ឌដូនពេញ រាជធានីភ្នំពេញ មានជនសង្ស័យ២នាក់ បានធ្វើសកម្មភាពកាច់សោរ.ក ម៉ូតូម៉ាក SUZUKI NEX មួយគ្រឿង ពាក់ស្លាកលេខ ភ្នំពេញ 1FE-3775 យកទៅបាត់ដោយសុវត្ថិភាពមិនរំខានដល់មន្រ្តីប៉ុស្តិ៍នោះឡើយ ។

ប្រភពដដែលបន្តថា លុះនៅវេលាម៉ោង៤និង៤០នាទីរសៀលថ្ងៃទី៨ ខែតុលា ឆ្នាំ២០១៩ ស្ថិតតាមបណ្ដោយផ្លូវលេខ ១៥៤ ក្នុងសង្កាត់ផ្សារកណ្ដាលទី២ ខណ្ឌដូនពេញ រាជធានីភ្នំពេញ មានករណីជនសង្ស័យ បានមកធ្វើសកម្មភាពលួចម៉ូតូមួយគ្រឿងទៀត ម៉ាក SUZUKI NEX ស៊េរីឆ្នាំ ២០១៨ ពណ៌ស-ក្រហម មានស្លាកលេខ 1GV-3351 ទើបតែទិញក្នុងតម្លៃ១,៧០០ដុល្លារ ខណៈដែលជនរងគ្រោះចតទុកមុខបន្ទប់ជួល ។

ក្រោយកើតហេតុ ជនរងគ្រោះ បានត្រឹមតែទៅដាក់ពាក្យបណ្ដឹង នៅប៉ុស្តិ៍នគរបាលរដ្ឋបាលទាំងនោះ ដើម្បីឲ្យសមត្ថកិច្ចជួយធ្វើអន្តរាគមន៍ ដើម្បីស្វែងរកជនសង្ស័យទាំងនោះយកមកដាក់ទោសតាមច្បាប់តែប៉ុណ្ណោះ ។

ចុងក្រោយប្រជាពលរដ្ឋក៏សំណូមពរលោក ទៀង ច័ន្ទសារ អធិការនគរបាលខណ្ឌដូនពេញ មេត្តាជួយមើលមន្ត្រីនៅតាមបណ្ដាប៉ុស្តិ៍មួយចំនួនរបស់លោកផង ព្រោះនៅពេលប្រជាពលរដ្ឋមានបញ្ហាម្តងៗ ពិបាកក្នុងការជួយធ្វើអន្តរាគមន៍ខ្លាំងណាស់ ៕ស រស្មី