សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប ៖ រថយន្តដឹកត្រីរបស់ឈ្មួញ គង់ ឡាំ ចេញពីប្រទេសវៀតណាមឆ្លងកាត់ច្រើនខេត្ត ដល់ខេត្តសៀមរាប ឆ្ពោះទៅតំបន់ប៉ោយប៉ែត ឆ្លងចូលទៅប្រទេសថៃបង្កឲ្យមានការភ្ញាក់ផ្អើលយ៉ាងខ្លាំងដល់ប្រជាពលរដ្ឋនៅក្រុងសៀមរាបនាពេលបច្ចុប្បន្ន ។ ដោយអាងលើភាពស្របច្បាប់ ការដឹកជញ្ជូនត្រីនេះពួកគេបានផ្ទេរត្រីពីរថយន្តមួយទៅរថយន្តមួយទៀតនៅកណ្តាលក្រុងសៀមរាប បង្កឲ្យមានការថ្នាំងថ្នាក់ពីប្រជាពលរដ្ឋជារៀងរាល់ថ្ងៃ ។
បើតាមសេចក្តីរាយការណ៍បានឲ្យដឹងថា ត្រីរបស់ឈ្មួញ គង់ ឡាំ ដែលជាអ្នកកាងនោះមានការយល់ព្រម ឬមានច្បាប់ចេញដោយអគ្គនាយកដ្ឋានរដ្ឋបាលជលផល ប៉ុន្តែថា ច្បាប់អនុញ្ញាតឲ្យដឹកត្រីមួយតោន ពួកគេដឹក១០តោន មិនទាន់ឈប់ទេ ។ ចំណុចនេះ គួរតែអគ្គនាយកដ្ឋានរដ្ឋបាលជលផលពិនិត្យពិច័យឲ្យបានច្បាស់លាស់ ពីព្រោះថា ពួកឈ្មួញតែងតែបន្លំអំពីបញ្ហានេះដើម្បីផលប្រយោជន៍របស់ពួកគេ ។ ពិតហើយ សមត្ថកិច្ចតាមដងផ្លូវត្រូវបានថៅកែត្រីចែករំលែកផលប្រយោជន៍ឲ្យខ្លះៗ ប៉ុន្តែវាជារឿងដែលពួកឈ្មួញទាំងនេះ កេងប្រវញ្ចលើច្បាប់របស់អគ្គនាយកដ្ឋានរដ្ឋបាលជលផល ។ មិនតែប៉ុណ្ណោះ បច្ចុប្បន្នពួកគេកំពុងធ្វើឲ្យប្រជាពលរដ្ឋនៅក្រុងសៀមរាបក្តៅក្រហាយផងដែរ ។
ពលរដ្ឋដែលធ្វើដំណើរតាមផ្លូវជាតិលេខ៦បានលើកឡើងថា ជារៀងរាល់ព្រឹក មានរថយន្តកូរ៉េ៥តោន និង រថយន្តក្រុងដែលគេដឹងថា ជារថយន្តដឹកត្រី បានមកចតនៅតាមបណ្ដោយផ្លូវជាតិលេខ៦ ពីខាងកើតផ្សារលើធំថ្មី នៃក្រុងសៀមរាប ដើម្បីសាងត្រីទម្លាក់ឲ្យម៉ូយ ប៉ុន្តែការសាងត្រីនេះបានធ្វើឲ្យជះក្លិនស្អុយឆ្អាបពេញផ្លូវ ។
រថយន្តដឹកត្រីនោះ ត្រូវបានគេដឹងថា រាល់ពេលដាក់ម្តងៗ ហូរទឹកឆ្អាប ប្រឡាក់មកលើផ្លូវ ជារៀងរាល់ព្រឹក ប៉ុន្តែមិនត្រូវបានខាងជំនាញពាក់ព័ន្ធ ណាមួយយកចិត្តទុកដាក់បញ្ចៀសនូវបញ្ហានេះឡើយ ។ កត្តាទាំងអស់នេះទំនងជាខាងជំនាញមួយចំនួន ទទួលបានផលប្រយោជន៍ ចូលហោប៉ៅ ហើយទើបធ្វើមិនដឹងមិនឃើញករណីខាងលើនេះ ។
ប្រជាពលរដ្ឋរស់នៅក្បែរកន្លែងនោះ បានលើកឡើងថា រថយន្តដឹកត្រីដែលមានទឹកហូរទឹកឆ្អាប មកលើផ្លូវជារៀងព្រឹកបែបនេះ មិនគួរណាមកចត សាងនៅទីប្រជុំជន ឬនៅផ្លូវដែលមានភ្ញៀវទេសចរណ៍ជាតិ និង អន្តរជាតិ នោះទេជាពិសេសផ្លូវជាតិនេះក៏មានរថយន្តគណៈប្រតិភូឆ្លងកាត់រាល់ដង ផងដែរ បើបណ្ដែតបណ្ដោយយូៗទៅកន្លែងចតនោះ កាន់តែមានសភាពស្អុយឆ្អាបខ្លាំងឡើងៗ ។
ចំណែក លោក នួន ពុធ្ធារ៉ា អភិបាលក្រុងសៀមរាប បានប្រាប់អ្នកកាសែតថា ជុំវិញការរថយន្តចតសាងត្រី នេះ ចាំលោកឲ្យអ្នកពាក់ព័ន្ធ ចុះទៅពិនិត្យមើល ។ ទោះយ៉ាងណាលោក នួន ពុទ្ធារ៉ា មិនបានអត្ថាធិប្បាយលម្អិតបាន នោះទេ ។ សូមបញ្ជាក់ថា រថយន្តដឹកត្រី ខ្នាតធំ ដែលចតពាក់កណ្ដាលផ្លូវជាតិលេខ៦ គេដឹងថា ដឹកត្រី មកពីប្រទេសវៀតណាម ។ មហាជនលើកឡើងថា ការដែលមានរថយន្តដឹកត្រី ចតសាង លើទីតាំងខាងលើនោះ អាចបណ្ដាលឲ្យប៉ះពាល់យ៉ាងខ្លាំងដល់ បរិស្ថាន ដូច្នេះពួកគាត់សង្ឃឹមថា អាជ្ញាធរជំនាញ និងមិនបណ្ដែត បណ្ដោយ ឲ្យមានតទៅទៀតទេ ។
ជុំវិញករណីខាងលើនោះដែរ មិនអាច សុំការពន្យល់ពី លោក ប្រធាន មន្ទីរបរិស្ថានខេត្ត និង លោក ប្រធានមន្ទីរកសិកម្មរុក្ខាប្រមាញ់ និងនេសាទ ឆ្នាំ២០១៩៕ ហេង សូរិយា
