សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ: រថយន្តកុងតឺន័រមួយគ្រឿងមានតែក្បាលសម្រាប់អូសទូកុងតឺន័រ បើកបរដោយយុវជនម្នាក់ បើកបោះពួយល្បឿនលឿន បួងចង្កូតមិនទាន់ជ្រុលបុកចូលផ្ទះជាងក្រឡឹង បណ្តាលឲ្យរងខូចខាតសម្ភារមួយចំនួន ។ ស្ត្រី៣នាក់ម៉ែកូន រត់គេចទាំងព្រលឹងចុងសក់ ចំណែកផ្ទះពេទ្យធ្មេញ និងផ្ទះជាងកាត់សក់ អមសងខាងនោះ ខូចខាតបន្តិចបន្តួច បង្កឲ្យភ្ញាក់ផ្អើលកាលពីវេលាម៉ោង១១និង២៥នាទីព្រឹក ថ្ងៃទី០៥ ខែវិច្ឆិកា ឆ្នាំ២០១៩ នៅតាមផ្លូវចោមចៅ ភូមិជ្រៃកោង សង្កាត់ចោមចៅ២ ខណ្ឌពោធិសែនជ័យ រាជធានីភ្នំពេញ ។
តាមសម្តីស្ត្រីម្ចាស់ផ្ទះ បានឲ្យដឹងថា មុនកើតហេតុ គ្រាន់តែគាត់វិលយកកូនចេញពីសាលារៀនវិញ ចូលផ្ទះផុត ស្រាប់តែ រថយន្តបង្ក បើកចូលមកដល់ក្នុងផ្ទះដែរ ភ័យស្លន់អូសដៃកូន២នាក់រត់គេចផុត ។
តាមប្រជាពលរដ្ឋឃើញហេតុការណ៍វិញ បានឲ្យដឹងថា មុនកើតហេតុ គេបានឃើញរថយន្តបង្ក ជាប្រភេទ ក្បាលអូសកុងតឺន័រ ពណ៌បៃតង ពាក់ស្លាកលេខ ព្រះសីហនុ 3A-1221 បើកបរដោយយុវជនម្នាក់ បើកបរល្បឿនលឿន ពីកើតទៅលិច ដល់ចំណុចខាងលើ បួងចង្កូតបំណង់ចូលទៅផ្លូវ បុរីផុន ស៊ុយ តែល្បឿននៃរថយន្តលឿនពេក ទើបយកចង្កូតមិនទាន់ ជ្រុលបុកចូលដល់ក្នុងផ្ទះប្រជាពលរដ្ឋតែម្តង សំណាងល្អគ្មានអ្នករងរបួស ។
តាមសម្តីយុវជនជាអ្នកបើកបររថយន្តបានឲ្យដឹងថា មុនកើតហេតុ ខ្លួនបើករថយន្តក្នុងបំណងចូលទូអូសទូកុងតឺន័រ តែយកចង្កូតមិនទាន់ក៏ជ្រុលបែបនេះ ។
ក្រោយកើតហេតុ ភាគីខាងតំណាងក្រុមហ៊ុនរថយន្តបង្ក ចេញមុខមកសម្របសម្រួល ដោយចេញសងរាល់ការខូចខាត សម្ភារៈ និងជួសជុលជញ្ជាំង សំយ៉ាបផ្ទះ ទាំងផ្ទះជាងក្រឡឹង ផ្ទះពេទ្យធ្មេញ និងផ្ទះកាត់សក់ ក្រោមការឯកភាពគ្នាជាមួយភាគីម្ចាស់ផ្ទះ ៕ សុខាសែនជ័យ
