សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ វីដេអូ ដែលបានចែកចាយពាសពេញបណ្តាញទំនាក់ទំនងសង្គមបានបញ្ជាក់ឲ្យដឹងកាលពីព្រលប់ថ្ងៃទី៧ ខែវិច្ឆិកា ឆ្នាំ២០១៩នេះថា ក្រុមហ៊ុនអាកាសចរណ៍ Thai Airways ប្រចាំនៅប្រទេសបារាំង មិនអនុញ្ញាតឲ្យលោកសម រង្ស៊ី ធ្វើដំណើរពីប្រទេសបារាំង ទៅកាន់ប្រទេសថៃនោះទេ ។
យោងតាមប្រភពព័ត៌មានក្នុងស្រុកមួយបានផ្សាយថា គម្រោងរបស់ លោក សម រង្ស៉ី ហោះហើរចាកចេញពីទីក្រុងប៉ារីស ទៅកាន់ទីក្រុងបាងកក ប្រទេសថៃ នោះត្រូវបានបរាជ័យហើយ ដោយសារតែមិនមានឈ្មោះ ក្នុងជើងហោះហើរពីប៉ារីស ទៅកាន់ទីក្រុងបាងកក នៅថ្ងៃទី៧ វិច្ឆិកា ឆ្នាំ២០១៩ឡើយ ។
ប្រភពបានបញ្ជាក់ថា មន្រ្តីជាន់ខ្ពស់អាកាសចរណ៍ស៊ីវិលកម្ពុជា បានថ្លែងនៅព្រលប់ថ្ងៃទី៧ ខែវិច្ឆិកា ឆ្នាំ២០១៩ថា «សម រង្ស៉ី មិនមានឈ្មោះក្នុងជើងហោះហើរពីប៉ារីស ទៅកាន់ទីក្រុងបាងកក នៅថ្ងៃទី៧ វិច្ឆិកានេះទេ» ដោយសារមិនមានឈ្មោះនៅក្នុងបញ្ជី ហោះហើរនៅថ្ងៃនេះឡើយ, ព្រោះសម្រាប់ថ្ងៃទី៧ វិច្ឆិកានេះ សម រង្ស៉ី បានពន្យារពេលជើងហោះហើរអស់ហើយ ។
ប្រភពព័ត៌មានខាងលើនេះ បានយោងតាមមន្រ្តីជាន់ខ្ពស់នៃក្រុមហ៊ុនអាកាសចរណ៍ Thai Airways ដែលបានថ្លែងប្រាប់មន្រ្តីអាកាសយានដ្ឋានអន្តរជាតិភ្នំពេញ នៅល្ងាចថ្ងៃទី៧ ខែវិច្ឆិកា ឆ្នាំ២០១៩។ មន្រ្តីជាន់ខ្ពស់អន្តោប្រវេសន៍មួយរូបថា «ភាគីខាងថៃក្រុមហ៊ុន Thai Airways បានបញ្ជាក់មកថា សម រង្ស៉ី មិនមានឈ្មោះឡើងលើយន្តហោះមកទីក្រុងបាងកកទេ» ។
គួរបញ្ជាក់ថា កាលពីថ្ងៃទី៦ ខែវិច្ឆិកា ឆ្នាំ២០១៩ កន្លងទៅនេះ នាយករដ្ឋមន្ត្រីថៃ លោកប្រាយុទ្ធ ចាន់អូចា បានថ្លែងក្នុងសន្និសីទមួយនៅទីក្រុងបាងកកថា កម្ពុជា និងថៃសុទ្ធតែជាប្រទេសសមាជិកសមាគមអាស៊ានដូចគ្នា ហើយថៃប្តេជ្ញារក្សាមិនជ្រៀតជ្រែកចូលកិច្ចការផ្ទៃក្នុងរវាងគ្នា នឹងគ្នាឡើយ ហើយថៃមិនអនុញ្ញាតឲ្យមនុស្សប្រឆាំងរដ្ឋាភិបាល ប្រើប្រាស់ប្រទេសថៃសម្រាប់ធ្វើសកម្មភាពនោះដែរ ។
លោកប្រាយុទ្ធ បានថ្លែងថា «ខ្ញុំសូមដាក់បទបញ្ជាដូច្នេះ ហើយគាត់ (សម រង្ស៊ី) ប្រហែលមិនអនុញ្ញាតឲ្យចូលទឹកដីប្រទេសថៃបានទេ» ៕
