សារព័ត៌មាន នគរវត្ត តែងតែនាំមុខគេជានិច្ច
នាយករដ្ឋមន្ត្រីម៉ាឡេស៊ី លោក មហាធៀ មហាមេដ បានថ្លែងថា គាត់កំពុង«ព្យាយាមស្វែងរកប្រទេសណាមួយ» ដែលអាចទទួលសមាជិកគណបក្សប្រឆាំងមួយរូប ដែលកំពុងព្យាយាមវិលត្រឡប់ទៅកាន់ប្រទេសកម្ពុជាវិញ ក្នុងឱកាសទិវាបុណ្យឯករាជ្យ ។ នេះបើតាមការផ្សាយរបស់គេហទំព័រ ABC.Net កាលពីព្រលប់ថ្ងៃទី៧ ខែវិច្ឆិកា ឆ្នាំ២០១៩ ។
ប្រភពបានបន្តថា រដ្ឋមន្ត្រីក្រសួងការបរទេសម៉ាឡេស៊ី លោក Saifuddin Abdullah បានថ្លែងថា លោកស្រី មួ សុខហួ អនុប្រធានគណបក្សប្រឆាំងកម្ពុជា គឺគណបក្សសង្គ្រោះជាតិ( CNRP)នោះ ត្រូវបានឃុំខ្លួនដោយមន្ត្រីអន្តោប្រវេសន៍របស់ម៉ាឡេស៊ី បន្ទាប់ពីបានមកដល់អាកាសយានដ្ឋានទីក្រុង គូឡាឡាំពួរ កាលពីយប់ថ្ងៃទី៦ ខែវិច្ឆិកា ឆ្នាំ២០១៩ ក្នុងដំណើរមួយមកពីទីក្រុង ហ្សាការតា ប្រទេសឥណ្ឌូនេស៊ីនោះ ។
គោលជំហររបស់លោកនាយករដ្ឋមន្ត្រីម៉ាឡេស៊ីខាងលើនេះ ក៏ជាឆ្លុះបញ្ចាំងផងដែរ ដែលថា ប្រទេសថៃ នៅក្នុងសប្តាហ៍នេះ ក៏បានរារាំងមន្ត្រីគណបក្សប្រឆាំងកម្ពុជាមិនឲ្យធ្វើដំណើរឆ្លងកាត់ប្រទេសថៃ ទៅកាន់ទឹកដីកម្ពុជាដាច់ខាត ។
នៅរសៀលថ្ងៃទី៧ ខែវិច្ឆិកា ឆ្នាំ២០១៩ លោកសម រង្ស៊ី មេដឹកនាំគណបក្សសង្គ្រោះជាតិ មិនត្រូវបានក្រុមហ៊ុនអាកាសចរណ៍ ថៃអ៊ែរវ៉េយ ប្រចាំនៅប្រទេសបារាំង អនុញ្ញតឲ្យឡើងយន្តហោះ ធ្វើដំណើរទៅកាន់ប្រទេសថៃនោះឡើយ ដោយសារតែអាជ្ញាធររបស់ប្រទេសថៃបានចេញព្រមានដល់ក្រុមហ៊ុនអាកាសចរណ៍ថា មិនត្រូវ ឲ្យរូបសមរង្ស៊ីចូលទៅកាន់ប្រទេសថៃ ។ ប៉ុន្តែយ៉ាងណាក៏ដោយ លោកសម រង្ស៊ី ប្តេជ្ញាថា នឹងរកជើងហោះហើរផ្សេងជំនួសវិញ ។
លោក មហាធៀ បានមានប្រសាសន៍ថា គាត់មិនអនុញ្ញាតឲ្យប្រទេសម៉ាឡេស៊ី ត្រូវបានប្រើប្រាស់ជាទីកន្លែងដើម្បីធ្វើសកម្មភាពនយោបាយក្នុងតំបន់នោះឡើយ ៕
