សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងនគរបាលចម្រុះក្រសួងមហាផ្ទៃ សហការជាមួយកម្លាំងនគរបាលខណ្ឌពោធិ៍សែនជ័យ បានចុះបង្ក្រាបចាប់ខ្លួនជនជាតិចិនចំនួន១១នាក់ ពាក់ព័ន្ធនឹងករណីចាប់ជំរិតជនជាតិចិនដូចគ្នា និងរំដោះជនរងគ្រោះម្នាក់ ។
ប្រតិបត្តិការណ៍នេះបានធ្វេីឡេីងកាលពីវេលាម៉ោង១០និង៣០នាទីព្រឹក ថ្ងៃទី០៨ ខែវិច្ឆិកា ឆ្នាំ២០១៩ នៅចំណុចបុរីព្រីនថោន ផ្ទះលេខ១០៩ ផ្លូវលេខ១០៩ ភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។
លោកវរៈសេនីយ៍ឯក យឹម សារ៉ាន់ អធិការនគរបាលខណ្ឌពោធិ៍សែនជ័យ បានឲ្យដឹងថា មុនឈានដល់ការឃាត់ខ្លួនជនសង្ស័យខាងលេី កម្លាំងនគរបាលការិយាល័យក្រសួងមហាផ្ទៃបានទទួលពាក្យបណ្តឹងពីស្ថានទូតចិន ដោយមានជនជាតិចិនមួយក្រុម បាននាំគ្នាចាប់បង្ខាំង និងជំរិតបុរសជនជាតិចិនម្នាក់ទារប្រាក់ ។ បន្ទាប់ពីទទួលពាក្យបណ្តឹងរួច កម្លាំងនគរបាលក៏បានស្រាវជ្រាវរហូត កំណត់មុខសញ្ញាបានទេីបសហការជាមួយនគរបាលខណ្ឌពោធិ៍សែនជ័យ និងចុះទៅបង្ក្រាបភ្លាមៗតែម្តង ។
ក្នុងប្រតិបត្តិការនេះ កម្លាំងនគរបាលបានឃាត់ខ្លួនជនសង្ស័យ ជាជនជាតិចិនចំនួន១១នាក់ និងរំដោះជនជាតិចិនជាជនរងគ្រោះម្នាក់ផងដែរ ។
បច្ចុប្បន្នជនសង្ស័យត្រូវបាននគរបាលបញ្ជូនទៅការិយាល័យក្រសួងមហាផ្ទៃ ដេីម្បីចាត់ការតាមច្បាប់ ៕ សុខាសែនជ័យ
