ជនសង្ស័យមួយក្រុមជិះរថយន្តធ្វើសកម្មភាពប្លន់យកការបូបស្ពាយពីជនជាតិបរទេសម្នាក់ជិះកង់ឥណ្ឌាបានសម្រេច

ភ្នំពេញ៖ ជនសង្ស័យមួយក្រុមជិះរថយន្តស៊េរីទំនើប មកកាក់ពីមុខម៉ូតូកង់បីឥណ្ឌាមួយគ្រឿងរួចដកកាំបិតចុងប្លន់ លើបុរសជនជាតិបរទេសម្នាក់ជាភ្ញៀវ ខណៈកំពុងជិះកង់បីឥណ្ឌាយកការបូបស្ពាយបានសម្រេចរួចនាំគ្នាឡើងជិះរថយន្តគេចខ្លួនបាត់ស្រមោល ។

ហេតុការណ៍នេះ កើតឡើងកាលពីម៉ោង២យប់ រំលងអធ្រាត្រឈាន ចូលថ្ងៃទី ២៦ ខែវិច្ឆិកា ឆ្នាំ២០១៩ ស្ថិតនៅតាមបណ្តោយផ្លូវលេខ៥៩ ខាងមុខកន្លែងលក់ផ្កា ក្នុងសង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ ។

តាមការរៀបរាប់ពីម្ចាស់ម៉ូតូកង់បីឥណ្ឌាឲ្យដឹងថា មុនពេលកើតហេតុរូបគាត់បានបើកម៉ូតូកង់បីឥណ្ឌាមួយគ្រឿងពណ៌ស ពាក់ស្លាកលេខ តាកែវ 1P-8671 បានដឹកជនរងគ្រោះជាភ្ញៀវចេញពីម្តុំអូឡាំពិក គោលបំណងយកភ្ញៀវមកដាក់នៅបុរីប៉េងហួត ដោយធ្វើដំណើរបណ្តោយផ្លូវលេខ៥៩ក្នុង ទិសដៅពីត្បូងទៅជើង ខណៈមកដល់ចំណុចកើតហេតុ ក៏មានជនសង្ស័យចំនួន ៣នាក់បិតមុខជិះរថយន្តម៉ាកស្តារិចមួយគ្រឿង ពណ៌ខ្មៅ បានបិទស្លាកលេខមុខក្រោយជិត ជិះមកកាក់ម៉ូតូកង់បីរបស់គាត់ហើយរូបគាត់បានឈប់ ។ ភ្លាមនោះជនសង្ស័យ២នាក់ជាបក្ខពួកបានចុះពីលើរថយន្តរួចដកកំបិតភ្ជង់ជនរងគ្រោះជាភ្ញៀវប្លន់យកកាបូកស្ពាយបានសម្រេច រួចនាំគ្នាឡើងជិះរថយន្តគេចខ្លួនបាត់ ។ ក្រោយហេតុការណ៍ជនរងគ្រោះបានជិះម៉ូតូកង់បីបន្តទៅកន្លែងស្នាក់នៅរបស់គាត់វិញបាត់ដោយមិនបានទៅដាក់ពាក្យបណ្ដឹងនោះទេ ។

បន្ទាប់ពីកើតហេតុសមត្ថកិច្ចមូលដ្ឋានបានចុះមកដល់រួចបានសួរនាំទៅលើម្ចាស់ម៉ូតូកង់បីឥណ្ឌាងាយស្រួលសមត្ថកិច្ចស្រាវជ្រាវមុខសញ្ញាជនសង្ស័យដើម្បីស្វែងរកចាប់ខ្លួនយកមកផ្តន្ទាទោសតាមផ្លូវច្បាប់ ៕ ជ្រោយពេជ្រ