សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មនុស្សប្រុសស្រី ៤ នាក់បានរងរបួសធ្ងន់ស្រាល ខណៈបើកម៉ូតូឌុបគ្នាតាមដងផ្លូវត្រូវបានរថយន្តពាក់ស្លាកលេខខេមរភូមិន្ទបុករួចរត់គេចខ្លួនបាត់ស្រមោលបន្សល់ទុកតែស្លាកលេខជាងកាងរថយន្តនៅនឹងកន្លែងកើតហេតុ ។
ហេតុការណ៍នេះ កើតឡើងកាលពីម៉ោង ១និង ៣០យប់រំលងអធ្រាត្ររឈានចូលថ្ងៃទី ៣០ ខែវិច្ឆិកា ឆ្នាំ២០១៩ ស្ថិតនៅតាមបណ្តោយផ្លូវណតព្រីត ខាងមុខខារ៉ាអូខេដឹឃ្វីន ក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ។
ប្រភពព័ត៌មាននៅកន្លែងកើតហេតុបានឲ្យដឹងថា មុនកើតហេតុគេឃើញបុរស ២នាក់រួមដំណើរ និងស្ត្រី ២ នាក់ទៀតបើកម៉ូតូមួយគ្រឿងម៉ាកហុងដា ឌ្រីមសង់ ២០១៦ ពាក់ស្លាកលេខភ្នំពេញ 1FN-7298 ធ្វើដំណើរបណ្តោយផ្លូវណតប្រ៊ីត ទិសដៅពីជើងទៅត្បូង ខណៈមកដល់ចំណុចកើតហេតុ ក៏មានរថយន្តមួយគ្រឿងមិនចាំម៉ាកពណ៌ស ពាក់ស្លាកលេខ ខេមរភូមិន្ទ 01 2-3985 ធ្វើដំណើរមកពីក្រោយបានបត់ស្ដាំដៃទៅបុកម៉ូតូពេញទំហឹងបណ្ដាលឲ្យដួលបោកនឹងថ្នល់រងរបួសធ្ងន់ស្រាលទាំងបួននាក់ ត្រូវបានបញ្ជូនតាមម៉ូតូកង់បីទៅសង្គ្រោះនៅឯមន្ទីរពេទ្យភ្លាមៗ ចំណែករថយន្តបានបើករត់គេចខ្លួនបាត់ស្រមោលបន្សល់ទុកតែស្លាកលេខជាប់កាងរថយន្តនៅនឹងកន្លែងកើតហេតុ ។
បន្ទាប់ពីកើតហេតុសមត្ថកិច្ចមូលដ្ឋានបានចុះមកដល់បានទំនាក់ទំនងទៅសមត្ថកិច្ចជំនាញចុះមកយកម៉ូតូ និងលេខរថយន្តទៅរក្សាទុកនៅអធិការនគរបាលខណ្ឌសែនសុខដើម្បីស្រាវជ្រាវរកម្ចាស់រថយន្តមកដោះស្រាយគ្នានៅពេលក្រោយ ៕ ជ្រោយពេជ្រ
