ជនសង្ស័យឆក់កាបូបពីស្ត្រីម្នាក់ទាញធ្លាក់ពីលើម៉ូតូរងរបួស

ភ្នំពេញ ៖ ស្ត្រីម្នាក់ខណៈជិះម៉ូតូឌុបគ្នាជាមួយមិត្តភក្តិ វិលមកពីផ្សារ ត្រូវបានក្រុមជនសង្ស័យធ្វើសកម្មភាពឆក់កាបូប តែបោចទាញបានតែខ្សែ ហើយយករត់គេចខ្លួនបាត់ ធ្វើឲ្យស្ត្រីរងគ្រោះធ្លាក់ពីលើម៉ូតូរងរបួសប៉ោងមុខប៉ោងមាត់ កាលពីវេលាម៉ោង១និង២០នាទីរសៀល ថ្ងៃទី០១ ខែធ្នូ ឆ្នាំ២០១៩ នៅតាមផ្លូវជាតិលេខ៣ ភូមិក្រាំងដូនទៃ សង្កាត់កន្ទោក ខណ្ឌកំបូល រាជធានីភ្នំពេញ ។

ស្ត្រីរងគ្រោះមានឈ្មោះ សុខ ជា អាយុ៣៩ឆ្នាំ មានទីលំនៅ ភូមិទឹកថ្លា សង្កាត់ក្រាំងពង្រ ខណ្ឌដង្កោ រងរបួសធ្ងន់ ប៉ោងមុខមួយចំហៀង ។ តាមតាមស្ត្រីខាងលើ ឲ្យដឹងថា ក្នុងកាបូបមានលុយជាង៣មុឺនរៀលប៉ុណ្ណោះ ត្រូវបានចោរឆក់យកខ្សែកាបូបទៅបាត់ដោយសុវត្ថិភាព បន្សល់ទុកតែបូបដាច់ខ្សែកាន់ច្បាមចាប់ជាប់ ។

តាមស្ត្រីជាមិត្តភក្តិ បានឲ្យដឹងថា មុនកើតហេតុ ខណៈដែលជិះម៉ូតូ ស្កុបពី ពណ៌ស ពាក់ស្លាកលេខ កណ្តាល 1AF-1088 ឌុបគ្នាធ្វើដំណើរ តាមផ្លូវជាតិលេខ៣ ពីជើងទៅត្បូង ឆ្ពោះទៅផ្ទះ លុះដល់ចំណុចខាងលើ ស្រាប់តែមានជនសង្ស័យគ្នា២នាក់ ជិះម៉ូតូ ម៉ាកហុងដា សេ១២៥ ពណ៌ខ្មៅ មិនចាំស្លាកលេខ តាមពីក្រោយមកឆក់ទាញខ្សែកាបូបពីជនរងគ្រោះកំពុងជិះខាងក្រោយ ដាច់តែខ្សែ ជនសង្ស័យយកខ្សែជិះរត់គេចទៅបាត់ស្រមោល ស្ត្រីរងគ្រោះធ្លាក់ពីលើម៉ូតូ ផ្កាប់មុខ រងរបួសប៉ោងមួយចំហៀង ដៃកាន់ឱបកាបូបជាប់ ហេងវិញលុយក្នុងកាបូបមានជាង៣មុឺនរៀល ចោរយកអត់បាន តែសំណាងអាក្រក់មួយប៉ោងមុខ ។

ក្រោយកើតហេតុ ជនរងគ្រោះត្រូវបានសាច់ញាតិហៅរថយន្តសង្គ្រោះអង្គភាព៧១១ បំរ៉ុងដឹកយកទៅពេទ្យ តែស្ត្រីរងគ្រោះ សុំទៅផ្ទះវិញដោយខ្លួនឯង ក្រុមសង្គ្រោះបានជួយជូតលាងរបួសជូន ហើយជនរងគ្រោះឡើងជិះម៉ូតូកង់បី ទៅដេកស្អំពន្លៃនៅផ្ទះដោយខ្លួនឯង ៕ សុខាសែនជ័យ​