សារព័ត៌មាន នគរវត្ត តែងតែនាំមុខគេជានិច្ច
កម្លាំងប៉ូលិសប្រឆាំងគ្រឿងញៀនវៀតណាមបានបានចាត់វិធានការទប់ស្កាត សកម្មភាពជួញដូរគ្រឿងញៀនឆ្លងដែលដោយភាគច្រើន ឆ្លងចូលពីប្រទេសឡាវ ។ នៅពេលនេះ ប៉ូលិសវៀតណាមចាប់ខ្លួនជនជាតិឡាវរត់ពន្ធគ្រឿងញៀន២៨គីឡូក្រាម ។
គេហទំព័រ វៀតណាមvnexpress ផ្សាយកាលពីថ្ងៃទី២៤ ខែធ្នូ ឆ្នាំ២០១៩ថា ជនជាតិឡាវទាំងពីរនាក់នោះ ត្រូវប៉ូលិសចាប់ខ្លួននៅក្នុងខេត្ត Nghe An កាលពីថ្ងៃទី២៣ ខែធ្នូ ។
ប៉ូលិសវៀតណាមបានឃាត់ខ្លួនបុរសឡាវទាំងពីរនាក់នោះខណៈកំពុងធ្វើចរាចរណ៍ដោយរថយន្តមួយគ្រឿងនៅលើផ្លូវហាយវ៉េ ហូជីមិញ នៅវេលាម៉ោងប្រហែល៣និង៣០នាទីរំលងអធ្រាត្រ ស្ថិតនៅឃុំ Thanh Thuy ស្រុក Thanh Chuong ខេត្ត Nghe An ។
ជនល្មើសព្យាយាមរត់គេចខ្លួនដែរ ប៉ុន្តែមិនបានសម្រេច សមត្ថកិច្ចវៀតណាមចាប់ខ្លួន រកឃើញអត្តសញ្ញាណថា ជាជនជាតិឡាវ មកពីខេត្ត Bolikhamsai ។ គួរបញ្ជាក់ថា កាលពីខែវិច្ឆិកា ឆ្នាំ២០១៩ ប៉ូលិសវៀតណាមនៅខេត្តមួយនេះ បានបង្ក្រាបគ្រឿងញៀនចម្រុះបានជាង១២គីឡូក្រាមផងដែរ ។
កាសែតវៀតណាមបានឡើងថា តាមការកត់សម្គាល់ឃើញ វៀតណាមជាចំណុចឆងកាត់ការរត់ពន្ធគ្រឿងញៀនយ៉ាងសំខាន់ នៅក្នុងប្រទេសតំបន់អាស៊ីអាគ្នេយ៍ ជាពិសេសនៅអំឡុងប៉ុន្មានឆ្នាំចុងក្រោយនេះ គឺមានការកើនឡើងខ្លាំង បើទោះបីវៀតណាមមានច្បាប់តឹងរ៉ឺងជាងគេនៅលើពិភពលោកប្រឆាំងនឹងគ្រឿងញៀនក៏ដោយ ។
ច្បាប់នៅក្នុងប្រទេសនេះ មានដាក់ទោសជនល្មើសគ្រឿងញៀនរហូតដល់ប្រហារជីវិតផងដែរ កុំថាឡើយទោសអស់មួយជីវិត ៕
