ស្រ្ដីម្នាក់ត្រូវរថយន្ដធុនធំបុកស្លាប់ ខណៈបើកម៉ូតូឆ្លងផ្លូវ

ខេត្តកណ្តាល៖ ស្រ្ដីម្នាក់ ខណៈជិះម៉ូតូដល់ចំណុចភ្លើងស្ដុបបានបត់ឆ្លងផ្លូវកាត់មុខរថយន្ដធំធុន ធ្វើឲ្យរថយន្ដធុនធំបុកស្លាប់យ៉ាងអាណោចអាធ័ម នៅរសៀលថ្ងៃទី២៩ ខែធ្នូ ឆ្នាំ២០១៩ នៅចំណុចផ្លូវជាតិលេខ៤ ស្ថិតក្នុងភូមិថ្នល់ទទឹង ឃុំដំណាក់អំពិល ស្រុកអង្គស្នួល ខេត្តកណ្ដាល ។

មន្រ្ដីនគរបាលចរាចរណ៍ស្រុកអង្គស្នួលបានឲ្យដឹងថា ស្រ្ដីរងគ្រោះមានឈ្មោះ ផល ចាន់ណា អាយុ២៩ឆ្នាំ ជនជាតិខ្មែរ មុខរបរកម្មការិនីរោងចក្រ មានទីលំនៅភូមិក្បាលកោះ ឃុំកោះខ្សាច់ទន្លា ស្រុកស្អាង ខេត្តកណ្ដាល បើកបរម៉ូតូ Zoomer-X ពណ៌ខ្មៅ គ្មានស្លាកលេខ ។ ចំណែករថយន្ដម៉ាក SCANIA ពណ៌ស ពាក់ស្លាកលេខភ្នំពេញ ៣E-៧៧៧៣ បើកបរដោយជនមិនស្គាល់អត្តសញ្ញាណរត់គេចខ្លួនបាត់ ។

ប្រភពដដែលបន្ដថា នៅមុនពេលកើតហេតុមានម៉ូតូ១គ្រឿងម៉ាកហុងដា Zoomer-X ពណ៌ខ្មៅគ្មានស្លាកលេខ បានបើកឆ្លងផ្លូវពីជើងទៅត្បូង ។ លុះមកដល់ចំណុចកើតហេតុ មានរថយន្ត១គ្រឿងម៉ាក SCANIA ពណ៌ស បើកបរដោយជនមិនស្គាល់អត្តសញ្ញាណ ឈប់ស្ដុបរងចាំភ្លើងខៀវដើម្បីបន្ដដំណើរទៅមុខទៀត លុះស្ដុបមានសញ្ញាភ្លើងខៀវ អាទិភាព រថយន្ដក៏បន្តដំណើរទៅមុខតិចៗ ដោយមិនបានមើលម៉ូតូស្រ្ដីរងគ្រោះឆ្លងផ្លូវពីមុខរថយន្ត បណ្ដាលឲ្យរថយន្តបុកស្រ្ដីរងគ្រោះបើកបរម៉ូតូស្លាប់នៅនឹងកន្លែងកើតហេតុតែម្ដង ។

ក្រោយពីមានហេតុការណ៍កើតឡើង សមត្ថកិច្ចនគរបាលចរាចរណ៍បានចុះដល់កន្លែងកើតហេតុ រួចពិនិត្យ វាស់វែង កសាងឯកសារយកមធ្យោបាយពាក់ព័ន្ធទាំង២គ្រឿងមករក្សាទុកនៅអធិការដ្ឋាននគរបាលស្រុកដើម្បីចាត់ការតាមច្បាប់ ។

ចំពោះករណីនេះ សមត្ថកិច្ចជំនាញសន្និដ្ឋានថា បណ្តាលមកពីអ្នកបើកបររថយន្តបើកបរខ្វះការប្រុងប្រយ័ត្នមិនឃើញម៉ូតូឆ្លងកាត់ ។ ចំណែកអ្នកបើកបរម៉ូតូ ឆ្លងផ្លូវខ្វះការប្រុងប្រយ័ត្ន ។ ចំពោះសពស្រ្ដីរងគ្រោះ ត្រូវបានកម្លាំងជំនាញប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ៕ ស្អាងជ័យ