សមត្ថកិច្ចក្រុងតាខ្មៅចាប់ខ្លួនជនសង្ស័យម្នាក់ករណីប៉ុនប៉ងលួច

ខេត្តកណ្ដាល៖ ជនសង្ស័យម្នាក់ ត្រូវសមត្ថកិច្ចក្រុងតាខ្មៅ ចាប់ខ្លួនក្នុងករណីប៉ុនប៉ងលួច ខណៈដែលសមត្ថកិច្ចចុះល្បាតការពារសន្តិសុខជូនប្រជាពលរដ្ឋក្នុងមូលដ្ឋាន ។ ករណីនេះ បានកើតឡើងនៅវេលាម៉ោង០៤ និង០០នាទីនៅចំណុចភូមិថ្មី១ សង្កាត់តាខ្មៅ ក្រុងតាខ្មៅ ខេត្តកណ្តាល។

មន្ត្រីនគរបាលក្រុងតាខ្មៅបានឲ្យដឹងថា ជនសង្ស័យឈ្មោះ វណ្ណា បូរិន ភេទប្រុស អាយុ២៨ឆ្នាំ ទីលំនៅភូមិក្រាំងស្តៅ ឃុំសិង្ហ ស្រុកសំរោង ខេត្តតាកែវ មុខរបរ:មិនពិតប្រាកដ ។ ចំណែកវត្ថុតាងដកហូតបានមាន៖ ម៉ូតូ១គ្រឿងម៉ាក SUZUKI nex ពណ៌សលាយទឹកក្រូច ស៊េរីឆ្នាំ២០២០ ពាក់ស្លាកលេខ:តាកែវ1U4893 ,សោលេខ៨រាងអក្សLចំនួន១ ,ដែកប្រាំមួយជ្រុងចុងសំប៉ែតចំនួន១ ។

ប្រភពដដែលបន្តថា នៅមុនពេលកើតហេតុ កម្លាំងនគរបាលក្រុងតាខ្មៅ ចេញចុះល្បាតក្នុងភូមិសាស្ត្រការពារសន្តិសុខជូនប្រជាពលរដ្ឋក្នុងមូលដ្ឋាន ខណៈមកដល់ចំណុចកើតហេតុក៏បានជួបជនសង្ស័យជិះម៉ូតូតែម្នាក់ឯង ងាកមើលឆ្វេងស្តាំ គួរអោយសង្ស័យ ក៏ឃាត់ខ្លួនសួរនាំ និងឆែកឃើញវត្ថុតាងនៅជាប់ និងខ្លួនជនសង្ស័យ ទើបកម្លាំងសមត្ថកិច្ច ឃាត់ខ្លួន បញ្ជូនមកកាន់អធិការដ្ឋាននគរបាលក្រុងតាខ្មៅ ដើម្បីចាត់ការតាមនីតិវិធី៕ ស្អាងជ័យ