សារព័ត៌មាន នគរវត្ត តែងតែនាំមុខគេជានិច្ច
ខេត្តតាកែវ៖ ក្រោមការយកចិត្តទុកដាក់ខ្ពស់ពីសំណាក់លោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ នៅព្រឹកថ្ងៃ ចន្ទ ១០ កើត ខែ មាឃ ឆ្នាំកុរ ព.ស.២៥៦៣ ត្រូវនឹងថ្ងៃទី៣ ខែកុម្ភ: ឆ្នាំ២០២០ បន្ទាប់ពីស្រាវជ្រាវកំណត់មុខសញ្ញាលើ ការផលិតគ្រឿងញៀន(កញ្ឆា)ខុសច្បាប់នៅស្រុកគិរីវង់នោះ កម្លាំងអធិការដ្ឋាននគរបាលស្រុកគិរីវង់បានបង្ក្រាប និងឃាត់មុខសញ្ញាលួចដាំដុះដំណាំកញ្ឆាខុសច្បប់មួយករណី នៅលើទីតាំងចម្ការកញ្ឆាខុសច្បាប់មួយកន្លែងត្រង់ចំណុច ខាងក្រោមភូមិដាជំពុះសេកស្ថិតក្នុង ឃុំព្រះបាទជាន់ជុំ ស្រុកគិរីវង់ ខេត្តតាកែវ ន ។
មន្រ្តីនគរបាលស្រុកគិរីវង្សបានឲ្យដឹងថា ក្នុងការបង្រ្កាបនេះសមត្ថកិច្ចបានឃាត់ខ្លួន ជនសង្ស័យដែលលួចដាំកញ្ឆាខុសច្បាប់ម្នាក់ឈ្មោះ ផន ម៉ុច ភេទប្រុស អាយុ ៣៥ឆ្នាំ ទីលំនៅភូមិជ្រោយ ឃុំព្រះបាទជាន់ជុំ ស្រុកគិរីវង់ ខេត្តតាកែវដែលជាមុខសញ្ញាសកម្មក្នុងការលួចលាក់ដាំកញ្ឆាខុសច្បាប់ច្រើនដងហើយ ។
ប្រភពដដែលបានឲ្យដឹងទៀតថា ខណ:ដែលសមត្ថកីច្ចជំនាញស្រាវជ្រាវដឹង គួបផ្សំមានសេចក្តីរាយការណ៍ពីប្រជាពលរដ្ឋល្អផងនោះ កម្លាំងនគរបាលស្រុកគិរីវង្សបានចូលទៅបង្រ្កាបដល់ទីតាំងខាងលើ ហើយខណៈជនសង្ស័យកំពុងស្នាក់នៅក្នុងចម្ការកញ្ឆាស្រោចទឹកដំណាំកញ្ឆារាប់រយដើមផងនោះ ទឿបសមត្ថកិច្ចឆ្មក់ទៅដល់ខាត់ខ្លួនបានតែម្តង ។
ជនសង្ស័យរូបនេះត្រូវបាន កម្លាំងជំនាញកំពុងសាកសួរបន្ថែម រីឯវត្ថុតាង ដំណាំកញ្ឆាខុសច្បាប់ កម្លាំងជំនាញកំពុងរក្សាទុកនៅទីតាំងខាងលើជាបណ្តោះអាសន្នទុកជាភស្តុតាង ដើម្បីកសាងសំណុំរឿងបញ្ជូនទៅតុលាការ និងរង់ចាំដកព្រមទាំងបំផ្លាញចោលតាមក្រោយ ៕ ប្រាថ្នា
