សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ សមត្ថកិច្ចនគរបាលប៉ុស្តិ៍រដ្ឋបាលបានឃាត់ខ្លួនបុរសសង្ស័យជាប្ដីបានប្រើហិង្សា យកដំបងឈើវាយទៅលើប្រពន្ធ បណ្ដាលឲ្យរងរបួសផ្ទៃមុខ គ្រាន់តែមានជម្លោះពាក្យសំដីបន្តិចបន្តួចប៉ុណ្ណោះ ។
ហេតុការណ៍នេះ បានកើតឡើងកាលពីវេលាម៉ោង៨ និង៣៥នាទីយប់ នៅថ្ងៃទី៣ ខែកុម្ភៈ ឆ្នាំ២០២០ ស្ថិតនៅភូមិស្វាយចេក ឃុំសំឡី ស្រុកកំពង់រោទិ៍ ខេត្តស្វាយរៀង ។
បើតាមសមត្ថកិច្ចនគរបាល ស្រុកបាមឲ្យដឹងថា ជនសង្ស័យជាប្ដីមានឈ្មោះគង់ រតនា អាយុ ៣៣ឆ្នាំ មុខរបរកសិករ មានទីលំនៅភូមិស្វាយចេក ឃុំសំឡី ស្រុកកំពង់រោទិ៍ ខេត្តស្វាយរៀង។
ចំណែកស្ត្រីរងគ្រោះជាប្រពន្ធមានឈ្មោះ យួ សារិត អាយុ៣៥ឆ្នាំ មានទីលំនៅភូមិស្វាយចេក ឃុំសំំំឡី ស្រុកកំពង់រោទិ៍ ដោយរងរបួសភ្នែកខាងស្តាំ ត្រូវបានបងប្អូនបញ្ជូនមកសង្គ្រោះនៅមន្ទីរពេទ្យបង្អែកជីភូក្រុងបាវិត ។
តាមអ្នកភូមិបានឲ្យដឹងថា មុនកើតហេតុគេឃើញក្រុមគ្រួសារប្ដីប្រពន្ធមួយនេះ បានមានជម្លោះពាក្យសំដីនឹងគ្នា ខណៈបុរសជាប្ដីមានអការស្រវឹង រហូតមកដល់យប់កើតហេតុ ស្រាប់តែទាញបានដំបងឈើប្រវែងជិតមួយម៉ែត្រ វាយទៅលើប្រពន្ធបណ្តាល ឲ្យរងរបួសភ្នែកខាងស្តាំទើបបង្កការភ្ញាក់ផ្អើល និងរាយការណ៍មកសមត្ថកិច្ចមូលដ្ឋានតែម្ដង ។
បច្ចុប្បន្ន ស្ត្រីរងគ្រោះជាប្រពន្ធត្រូវបានបងប្អូនយកទៅព្យាបាលនៅមន្ទីរពេទ្យបង្កែកជីភូចំណែកជនបង្ក ត្រូវបានសមត្ថកិច្ចឃាត់ខ្លួននៅប៉ុស្តិ៍រដ្ឋបាលដើម្បីកសាងសំណុំរឿងតាមច្បាប់ ៕ យឹម សុថាន
