ស្រុកព្រះនេត្រព្រះនិមន្តព្រះសង្ឈសូត្រធម៌ប្រោះព្រហ្មតាមដងផ្លូវជាតិលេខ៦កុំឲ្យឧស្សាហ៍គ្រោះថ្នាក់ចរាចរណ៍ពេក

ចែករំលែក៖

ខេត្តបន្ទាយមានជ័យ ៖ នគរបាលស្រុកព្រះនេត្រព្រះបាន និមន្តព្រះសង្ឈ៥អង្គ សូត្រប្រោះព្រហ្មតាមដងផ្លូវជាតិលេខ៦ ដើម្បីកុំឲ្យមានគ្រោះថ្នាក់ចរាចរណ៍ បន្ទាប់ពីដឹងថា នៅស្រុកព្រះនេត្រព្រះ គឺជាស្រុកមួយក្នុងចំណោមស្រុក ក្រុង ទាំង៩ នៃខេត្តបន្ទាយមានជ័យ ដែលតែងកើតមានករណីគ្រោះថ្នាក់ចរាចរណ៍ជាញឹកញាប់ជាងគេ។

ប្រភពព័ត៌មានមន្រ្តីនគរបាលស្រុកព្រះនេត្រព្រះបានឲ្យដឹងថា យោងតាមការប្រជុំរបស់ស្នងការដ្ឋាននគរបាលខេត្តបន្ទាយមានជ័យ ទាក់ទងនឹងបញ្ហាគ្រោះថ្នាក់ចរាចរណ៍កន្លងមកនោះ គឺស្រុក ក្រុងដែលជួបបញ្ហាគ្រោះថ្នាក់ចរាចរណ៍ច្រើនជាងគេ គឺស្រុកមង្គលបូរី ព្រះនេត្រព្រះ ស្វាយចេក អូរជ្រៅ ថ្មពួក និងក្រុងប៉ោយប៉ែត ។

ក្នុងកិច្ចប្រជុំនោះដែរះដែរ លោកឧត្តមសេនីយ៍ទោ អាត់ ខែម ស្នងករនគរបាលខេត្ត ក៏បានណែនាំដល់លោកអធិការនគរបាលស្រុក ក្រុង កំណត់ទីតាំងនិងចំណុចដែលតែងកើត មានគ្រោះថ្នាក់ចរាចរណ៍ញឹកញាប់ជាងគេ ដោយដាក់ស្លាកសញ្ញា ឬក៏ដាក់កម្លាំងនគរបាលចរាចរណ៍ នៅប្រចាំការទីនោះ ដើម្បីពញ្ញាក់ស្មារតីអ្នកបើកបរធ្វើដំណើរ មានការប្រុងប្រយ័ត្នពេលទៅដល់ចំណុចនោះ និងម្យ៉ាងវិញទៀតក្នុង១ឆ្នាំម្តង ឲ្យលោកអធិការនិមន្តព្រះសង្ឃសូត្រនិមន្តប្រោះព្រហ្មតាមដងផ្លូវឧស្សាហ៍គ្រោះថ្នាក់ចរាចរណ៍ដើម្បីរំដោះគ្រោះចង្រៃផងដែរ។

ដោយហេតុនេះហើយ ទើបនៅព្រឹកថ្ងៃទី១៨ ខែកុម្ភៈ ឆ្នាំ២០២០នេះ លោកវសេនីយ៍ឯកមាស ប្ញទ្ធី អធិការនគរបាលស្រុកព្រះនេត្រព្រះ បានឲ្យកងកម្លាំងនគរបាលផ្នែកសណ្តាប់ធ្នាប់ចរាចរណ៍នៃអធិការដ្ឋាននគរបាលស្រុក ដឹកនាំដោយលោកវរសេនីយ៍ទោ ប៉ៅ មិច អធិការរង ទទួលផែ្នកសណ្តាប់ធ្នាប់ចរាចរណ៍ ដឹកនាំកម្លាំងជំនាញចំនួន៥នាក់ និងនិមន្តព្រះចំនួន៥អង្គ សូត្រមន្តដើម្បីប្រោះព្រហ្មបញ្ចៀសនូវគ្រោះកាច ឧបទ្រពចង្រៃឲ្យចេញឲ្យឆ្ងាយ កុំឲ្យប្រជាពលរដ្ឋធ្វើដំណើរលើដងផ្លូវជាតិលេខ៦នេះ ជួបករណីគ្រោះថ្នាក់ចរាចរណ៍ និងសូមឲ្យមានសេចក្ដីសុខសេចក្ដីចម្រើន ដល់ប្រជាពលរដ្ឋដែលធ្វើដំណើរតាមដងផ្លូវ ដោយចាប់ពីព្រំប្រទល់ក្រុងសិរីសោភ័ណ ទៅដល់ព្រំប្រទល់ស្រុកក្រឡាញ់ ខេត្តសៀមរាប ។

ក្នងឱកាសនោះដែរ លោកវរសេនីយ៍ មាស ប្ញទ្ធី ក៏បានអំពាវនាវដល់អ្នកប្រើប្រាស់យានយន្តគ្រប់ប្រភេទ ត្រូវគោរពច្បាប់ចរាចរណ៍ ដោយ អ្កដំណើរបើករថយន្តត្រូវពាក់ខ្សែក្រវាត់សុវត្ថិភាព បើកបរមិនត្រូវជែង និងលើសល្បឿនកំណត់នោះទេ ៕ ប្រាថ្នា