សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បើករថយន្តដឹកទឹកកកងោកមួយភាំងជ្រុលទៅបុកម៉ូតូមួយគ្រឿងបំរុងបត់ឆ្លងផ្លូវកិនជាប់ក្រោមកង់រថយន្តអូសជាច្រើនម៉ែត្រសំណាងល្អម្ចាស់ម៉ូតូលោតទាន់មិនមានរងរបួស។
ហេតុការណ៍នេះកើតឡើងកាលពីម៉ោង៩ និង២០ នាទីយប់ថ្ងៃទី ២៧ ខែមីនាឆ្នាំ២០២០ នៅចំណុចមុខសាកលវិទ្យាល័យកម្ពុជា តាមបណ្តោយផ្លូវណតប្រ៊ីត ក្នុងសង្កាត់ទឹកថ្លា ខណ្ឌសែនសុខរាជធានីភ្នំពេញ។
ប្រភពពត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញបុរសម្នាក់បើកម៉ូតូម៉ាកធូដេ ពណ៌សពាក់ស្លាកលេខភ្នំពេញ1HS-6639 ធ្វើដំណើរតាមបណ្តោយផ្លូវណតប្រ៊ីត ក្នុងទិសដៅពីត្បូងទៅជើង ខណៈមកដល់ចំណុចកើតហេតុបម្រុងបត់ឆ្វេងដៃត្រឡប់ក្រោយ ក៏មានរថយន្តឃ្លុបមួយគ្រឿងដឹកទឹកកកពាក់ស្លាកលេខភ្នំពេញ3E-7408 បើកបរដោយបុរសម្នាក់បញ្ច្រាសទិសដៅគ្នាពីជើងទៅត្បូងរេចង្កូតមកខាងឆ្វេងដៃចូលមកផ្លូវម៉ូតូបុកពេញទំហឹងកិនជាប់ពីលើអូសជាច្រើនម៉ែត្រ។សំណាងល្អម្ចាស់ម៉ូតូលោតទាន់មិនមានរងរបួស។
បន្ទាប់ពកើតហេតុសមត្ថកិច្ចមូលដ្ឋាន និងជំនាញបានចុះមកដល់បានឱ្យភាគីទាំងសងខាងសម្របសម្រួលគ្នាដោយភាគីខាងរថយន្តបង្កបានចេញសំណងចំនួន ៤៥០ ដុល្លារទៅឲ្យខាងភាគីម៉ូតូដើម្បីបញ្ចប់រឿងនៅនឹងកន្លែងកើតហេតុ៕ជ្រោយពេជ្រ
