បុរសម្នាក់បានស្លាប់និងស្ត្រី០២នាក់ទៀតរងរបួស ដោយគ្រោះថ្នាក់ចរាចរណ៍រវាងរថយន្តនិងរថយន្ត

ខេត្តព្រះសីហនុ៖ បុរសម្នាក់បានស្លាប់និងស្ត្រី០២នាក់ទៀតរងរបួស ដោយគ្រោះថ្នាក់ចរាចរណ៍រវាងរថយន្តនិងរថយន្ត កាលពីម៉ោងជាង៩និង៣០នាទី យប់ថ្ងៃទី​១៨ ខែមេសា ឆ្នាំ២០២០ លើផ្លូវជាតិលេខ៤ ចន្លោះគីឡូម៉ែត្រ ១៩២-១៩៣ ស្ថិតនៅភូមិអូរតាប៉ាង ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ ។ សមត្ថកិច្ចប្រាប់ថា គ្រោះថ្នាក់ចរាចរណ៍នេះកើតឡើង រវាងរថយន្ត ០១គ្រឿងម៉ាក CRV ពណ៌សំបកឪឡឹក ពាក់ស្លាកលេខភ្នំពេញ 2B-3851 បើកបរដោយឈ្មោះ យាន យ៉ុង ភេទ ប្រុស អាយុ ៥០ឆ្នាំ មានទីលំនៅផ្ទះ ២៨សេ ផ្លូវ២៦៥ ភូមិ១៣ សង្កាត់ទឹកល្អក់៣ ខណ្ឌទួលគោក រាជធានីភ្នំពេញ មានអ្នករួមដំណើរចំនួន ០២នាក់ ឈ្មោះ ហង្ស ស្រីនិច ភេទស្រី អាយុ ២៣ឆ្នាំ មានទីលំនៅរាជធានីភ្នំពេញ និង ០១នាក់ទៀត ពុំទាន់ស្គាល់អត្តសញ្ញាណ ដែលមានទិសដៅពីភ្នំពេញ ឆ្ពោះមក ខេត្តព្រះសីហនុ លុះមកដល់ចំណុចខាងលើ រថយន្តនេះជ្រុលចូលទៅចំណែកផ្លូវម្ខាងទៀតរួចក៍បុករថយន្ត ០១គ្រឿងម៉ាក HYUNDAI ពណ៌ ស ពាក់ស្លាកលេខភ្នំពេញ3A-3877 ដែល មានទិសដៅផ្ទុយគ្នា បើកបរដោយឈ្មោះ តន ម៉ាប់ ភេទប្រុស អាយុ ២០ឆ្នាំ មានទីលំនៅភូមិកោះស្រា ឃុំត្រពាំងឃ្លាំង ស្រុកត្រពាំងឃ្លាំង ខេត្តកំពត ។

  គ្រោះថ្នាក់នេះបណ្តាលឲ្យស្លាប់មនុស្សចំនួន ០១នាក់ និងរបួសមនុស្សចំនួន ២នាក់ ៖

១. ឈ្មោះ យាន យ៉ុង អ្នកបើកបររថយន្ត CRV ស្លាប់នៅនឹងកន្លែងកើតហេតុ

២. ឈ្មោះ ហង្ស ស្រីនិច  អ្នករួមដំណើរលើរថយន្ត CRV របួសមធ្យម

៣. អ្នករួមដំណើរលើរថយន្ត CRV មិនទាន់ស្គាល់អត្តសញ្ញាណ របួសមធ្យម  ។

    ក្រោយកើតហេតុអ្នករងរបួសបានបញ្ជូនទៅមន្ទីរពេទ្យ និងចាត់ចែងសាកសពទុកជូនក្រុមគ្រួសារ ចំណែកអ្នកបើកបររថយន្តHYUNDAI នគរបាលបានឃាត់ខ្លួនបណ្តោះអាសន្ននាំមកសាកសួរ រួមនិងវត្ថុតាង រថយន្តចំនួន ០២គ្រឿងយកមករក្សាទុកនៅអធិការដ្ឋាន នគរបាលស្រុកព្រៃនប់ រងចាំដោះស្រាយបន្តនៅពេលក្រោយ៕ ឆ្លាម សមុទ្រ