រថយន្តមួយគ្រឿងបុករះម៉ូតូ៣គ្រឿង ស្លាប់ម្នាក់ របួសធ្ងន់ស្រាល២នាក់

ខេត្តបន្ទាយមានជ៏យ៖ គួរឲ្យរន្ធត់ខ្លាំងណាស់ពេលឃើញមនុស្សម្នាក់ស្លាប់ចំណែក២នាក់ទៀតរងរបួសធ្ងន់ស្រាលដោយសារតែថយន្តហាយឡេនឌ័រ១គ្រឿងបានបើកបុករះម៉ូតូចំនួន៣គ្រឿងជាបន្តបន្ទាប់ នៅវេលាម៉ោង៦និង៣៥នាទីល្ងាចថ្ងៃទី០៩ខែឧសភាឆ្នាំ២០២០ នៅលើកំណាត់ផ្លូវជាតិលេខ៥៦A ត្រង់ចំណុចមុខសាលាបឋមសិក្សាកកោះ ស្ថិតក្នុងភូមិកកោះ ឃុំស្លក្រាម ស្រុកស្វាយចេក ខេត្តបន្ទាយមានជ័យ។ 

 នគរបាលបានឲ្យដឹងថា នៅមុនពេលកើតហេតុមានរថយន្ត១គ្រឿងម៉ាកហាយឡេនឌ័រ ពណ៌ទឹកប្រាក់ ពាក់ស្លាកលេខភ្នំពេញ 2K.5821 (អ្នកបើកបរគេចខ្លួនបាត់មិនស្គាល់អត្តសញ្ញាណ)  បានបើកបរពីទិសខាងជើងទៅទិសខាងត្បូង ពេលមកដល់ចំណុចកើតហេតុបានបុកម៉ូតូ ចំនួន ៣គ្រឿងជាបន្តបន្ទាប់ធ្វើឲ្យមានមនុស្សស្លាប់និងរបួសតែម្ដង ។ 

នគរបាលបញ្ជាក់ថា ម៉ូតូទី១ម៉ាក yamaha exciterពណ៌ស ពាក់ស្លាកលេខប.មានជ័យ 1S . 3699  បើកបរដោយឈ្មោះ ឈាន ជាង ភេទប្រុស អាយុ ១៧ឆ្នាំរស់នៅភូមិកើតហេតុ រងរបួសស្រាល ម៉ូតូខូចខាតស្រាល។

ចំពោះម៉ូតូទី២ម៉ាក  Honda winner  ពណ៌ក្រហម (គ្មានស្លាកលេខ) បើកបរដោយឈ្មោះ ហ៊ាង សិទ្ធិ ភេទប្រុស អាយុ ១៧ ឆ្នាំ រស់នៅភូមិកើតហេតុ ស្លាប់នៅកន្លែងកើតហេតុ រីឯម៉ូតូខូចខាតធ្ងន់និងម៉ូតូទី៣ ម៉ាក Honda dream  ពណ៌ខ្មៅ ស៊េរីឆ្នាំ២០១៦ ពាក់ស្លាកលេខ ឧត្តរមានជ័យ 1C-5277   បើកបរដោយឈ្មោះ អឿន សំនាង ភេទស្រី អាយុ ៣៥ ឆ្នាំ រស់នៅភូមិកំណប់ ឃុំ ស្លក្រាម ស្រុកស្វាយចេក រងរបួសបាក់ដៃខាងឆ្វេងត្រូវបានបញ្ជូនទៅព្យាបាលនៅមន្ទីរពេទ្យបង្អែកកម្ពុជា-ជប៉ុនស្រុកមង្គលបុរី ម៉ូតូខូចខាតធ្ងន់ ។ 

នគរបាលបន្ថែមថា មូលហេតុដែលបង្កឲ្យកើតមានគ្រោះថ្នាក់នេះ បណ្តាលមកពីអ្នកបើកបររថយន្តបើកជែងក្នុងស្ថានភាពគ្រោះថ្នាក់។បច្ចុប្បន្នវត្ថុតាងរថយន្តត្រូវបានយកទៅរក្សាទុកនៅអធិការដ្ឋាននគរបាលស្រុកស្វាយចេក។ ចំពោះ ម៉ូតូ ៣ គ្រឿងត្រូវបានយកមករក្សាទុកនៅប៉ុស្តិ៍នគរបាលរដ្ឋបាលស្លក្រាម រង់ចាំចាត់ការតាមផ្លូវច្បាប់៕ ដោយ៖វណ្ណា