សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សមត្ថកិច្ចនគរបាលខណ្ឌឫស្សីកែវបានឃាត់ខ្លួនជនសង្ស័យម្នាក់ករណីលួចទូរស័ព្ទគេ កាលពីវេលាម៉ោង១០ព្រឹកថ្ងៃទី២២ ខែមិថុនា ឆ្នាំ២០២០ នៅចំណុចផ្ទះលេខ៣៦៩ តាមបណ្តោយផ្លូវជាតិលេខ៥ ភូមិមិត្តភាព សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។
លោកហ៊ាង ថារ៉េត អធិការនគរបាលខណ្ឌឫស្សីកែវបានឲ្យដឹងថា ជនសង្ស័យមានឈ្មោះ កែវ ពន្លឺ អាយុ៣៦ឆ្នាំ មុខរបរមិនពិតប្រាកដ មានទីលំនៅ មិនពិតប្រាកដ (មានសារធាតុញៀន) ។ចំណែកម្ចាស់ទូរស័ព្ទរងគ្រោះឈ្មោះ ធឿន ជានីតា ភេទស្រី អាយុ១៨ ឆ្នាំ មុខរបរបុគ្គលិកក្រុមហ៊ុន មានទីលំនៅកន្លែងកេីតហេតុខាងលើ។សម្ភារបាត់បង់គឺទូរស័ព្ទម៉ាកIphone 6+។
យោងតាមរបាយការណ៍របស់សមត្ថកិច្ចបានឲ្យដឹងថា នៅព្រឹកថ្ងៃទី២២ ខែមិថុនា ឆ្នាំ២០២០ វេលាម៉ោង៦ ជនរងគ្រោះបានដាក់ទូរសព្ទ័សាកថ្មនៅលើផ្ទះជិតជណ្តេីរ ហើយត្រូវជនសង្ស័យចូលលួចយករួចហេីយក៏គេចខ្លួនបាត់។ ជនរងគ្រោះបានមកដាក់ពាក្យបណ្តឹងនៅប៉ុស្តិ៍រដ្ឋបាល ហើយសមត្ថកិច្ចជំនាញបានបេីកការស្រាវជ្រាវ កំណត់បានអត្តសញ្ញាណជនសង្ស័យ រហូតឈានដល់ការឃាត់ខ្លួនបាននៅម៉ោង១០ព្រឹកថ្ងៃខែឆ្នាំដដែល នៅចំណុចផ្លូវព្រះមុនីវង្ស សង្កាត់ស្រះចក ខណ្ឌដូនពេញ រាជធានីភ្នំពេញ។ ក្រោយឃាត់ខ្លួនជនសង្ស័យបានប្រាប់ថាគេបានយកទូរស័ព្ទទៅប្រគល់ឱ្យឈ្មោះអាឡេវ យកទៅបញ្ចាំ ហេីយឈ្មោះនេះបានគេចបាត់ហើយ។
បច្ចុប្បន្នជនសង្ស័យសមត្ថកិច្ចជំនាញកំពុងសាកសួរយកចម្លេីយ ដេីម្បីកសាងសំណុំរឿងបញ្ចូនទៅសាលាដំបូងរាជធានីភ្នំពេញចាត់ការបន្តតាមនីតិវីធី៕ជ្រោយពេជ្រ
