នគរបាលទួលស្វាយព្រៃទី២ ឃាត់ខ្លួនជនសង្ស័យម្នាក់ ក្រោយឆក់កាបូបមិនបានសម្រេច

ភ្នំពេញ៖ ជនសង្ស័យម្នាក់ ជាមុខសញ្ញាឆក់កាបូបយ៉ាងសកម្មភាព នៅក្នុងរាជធានីភ្នំពេញ ត្រូវបានកម្លាំងប៉ុស្ដិ៍នគរបាលរដ្ឋបាលទួលស្វាយព្រៃទី២ ឃាត់ខ្លួនភ្លាមៗ បន្ទាប់ពីជនសង្ស័យរូបនេះធ្វើសកម្មភាពឆក់កាបូបមិនបានសម្រេច ក៏ប្រទះនិងកម្លាំងល្បាតចេញអន្តរាគមន៍ក្របួចជាប់តែម្តង ។

ករណីឃាត់ខ្លួនជនសង្ស័យខាងលើនេះ បានធ្វើឡើងកាលពីវេលាម៉ោង ១១ និង០៥នាទីព្រឹក ថ្ងៃទី២៥ ខែមិថុនា ឆ្នាំ២០២០ នៅចំណុចផ្លូវលេខ ២០៥ កែងផ្លូវ៣៤៨ ភូមិ៩ សង្កាត់ទួលស្វាយព្រៃ២ ខណ្ឌបឹងកេងកង រាជធានីភ្នំពេញ  ។

តាមប្រភពព័ត៌មានពីមន្ត្រីនគរបាលខណ្ឌបឹងកេងកង បានឲ្យដឹងថា៖ ជនសង្ស័យឈ្មោះ អេវ ណាវិន ភេទប្រុស អាយុ ២៨ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅផ្ទះជួលគ្មានលេខ ផ្លូវលេខ៦៣ សង្កាត់ចតុមុខ ខណ្ឌដូនពេញ ។ ចំណែកជនរងគ្រោះមិនស្គាល់អត្តសញ្ញាណ (ក្រោយកើតហេតុគេចចេញទៅបាត់ )។

វត្ថុតាងរួមមាន ៖ ម៉ូតូ មួយគ្រឿង ម៉ាកនិច ពណ៌សលាយលឿង ស៊េរី ២០១៦ ឡើង២០២០ ពាក់ស្លាកលេខ ភ្នំពេញ ១GS-៥៥៥៧ លេខតួ ៣២១០៨៥ លេខម៉ាស៊ីន ៣២១១២១ ។

បច្ចុប្បន្នជនសង្ស័យរួមនឹងវត្ថុតាង ត្រូវបានសមត្ថកិច្ចធ្វើការឃាត់ខ្លួននៅអធិការដ្ឋាននគរបាលខណ្ឌបឹងកេងកង ដើម្បីធ្វើការសាកសួរបន្ដ និងចាត់តាមនីតិវិធី ៕ដោយ៖ ស រស្មី