សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មានហេតុការណ៍ដ៏ភ្ញាក់ផ្អេីលមួយបានកើតឡើងបន្ទាប់ពីមន្ត្រីយោធាពាក់ស័ក្តិ៤ម្នាក់ផឹកស៊ីស្រវឹងហើយបានដកកាំភ្លេីងខ្លីបាញ់ចំនួន៣គ្រាប់ធ្វើឱ្យភ្ញាក់ផ្អើលដល់កម្លាំងនគរបាលមកឃាត់ខ្លួនកាលពីវេលាម៉ោង៧និង៣០នាទីយប់ថ្ងៃទី១២ ខែកក្កដា ឆ្នាំ២០២០ នៅក្នុងបន្ទប់ជួលលេខ C៥ ភូមិត្រពាំងរំចេកសង្កាត់ចោមចៅទី១ ខណ្ឌពោធិ៍សែនជ័យ។
ជនបង្កឈ្មោះ សោម ពិសិដ្ធ ភេទប្រុស អាយុ៣៦ឆ្នាំ មុខរបរមន្ត្រីយោធានៅ កងឯកភាពទីចាត់ការឃោសនាព័ត៌មាន អគ្គបញ្ជាការ ឋាន:វរសេនីយ៍ត្រី ប្រេីប្រាស់កាំភ្លើងខ្លីម៉ាកK៥៩។
តាមប្រភពព័ត៌មានបានឲ្យដឹងថា មុនពេលកេីតហេតុជនបង្កបានមកផឹកសុីជាមួយមិត្តភក្តិនៅបន្ទប់ខាងលើមានគ្នាចំនួន៤នាក់។ ពេលកំពុងផឹកសុីនោះជនបង្កបាននិយាយថាពិបាកចិត្តណាស់ ប៉ុន្តែមិនដឹងថាពិបាកចិត្តរឿងអ្វីនោះទេ លុះមួយសន្ទុះក្រោយមកជនបង្កបានដកកាំភ្លើងខ្លីពីចង្កេះបាញ់ចំនួន៣គ្រាប់ មួយគ្រាប់បាញ់ក្នុងបន្ទប់ទឹក មួយគ្រាប់បាញ់ទ្វារបន្ទប់ និងមួយគ្រាប់ទៀតបាញ់ឡើងលើ។ ពាក់ព័ន្ធនឹងហេតុការណ៍ខាងលេីនេះពុំមានមនុស្សរងរបួសនោះទេ។
បច្ចុប្បន្នជនបង្ករួមទាំងវត្ថុតាងត្រូវបាននគរបាលឃាត់ខ្លួន និងសាកសួរឱ្យបានលម្អិតនៃការផ្ទុះអាវុធនេះ៕
ដោយ៖សុខាសែនជ័យ
