សារព័ត៌មាន នគរវត្ត តែងតែនាំមុខគេជានិច្ច
ប៉ៃលិន៖ប្រជាពលរដ្ឋរស់នៅសង្កាត់អូរតាវ៉ៅ ក្រុងប៉ៃលិន រាប់ពាន់នាក់ បានទទួលស្បៀងអាហារក្នុងយុទ្ធនាការថ្ងៃទី១ ដឹកនាំដោយលោក អុី ឈានប្រធានក្រុមការងាររាជរដ្ឋាភិបាលចុះមូលដ្ឋានខេត្តប៉ៃលិន និងលោកស្រី បាន ស្រីមុំ អុី ឈាន អ្នកតំណាងរាស្ត្រមណ្ឌលប៉ៃលិន និងជាប្រធានគណ:កម្មាធិការសាខាកាកបាទក្រហមខេត្តប៉ៃលិន រួមទាំងលោក ផាន់ ចាន់ធុល អភិបាលខេត្តប៉ៃលិន។
ក្នុងយុទ្ធនាការនេះគ្រោងចុះរយៈពេល៣ថ្ងៃ គឺចាប់ពីថ្ងៃអាទិត្យ ទី១៩ រហូតដល់ថ្ងៃអង្គារទី២១ ខែកក្កដា ឆ្នាំ២០២០នេះ ទូទាំងក្រុងប៉ៃលិន។
មានប្រសាសន៍សំណេះសំណាល លោក អុី ឈាន បានផ្តាំផ្ញើ និងពាំនាំការនឹករលឹកពីប្រមុខរដ្ឋាភិបាល សម្តេចតេជោ ហ៊ុន សែន នាយករដ្ឋមន្ត្រី ដែលតែងតែនឹករលឹក និងគិតគូរសុខទុក្ខរបស់ប្រជាពលរដ្ឋ ពិសេសគឺពលរដ្ឋរស់នៅតាមបន្ទាត់ព្រំដែន និងតំបន់ដាច់ស្រយាល។
លោកក៏បានបន្តអំពាវនាវដល់គ្រួសារប្រជាពលរដ្ឋទាំងអស់ សូមបន្តប្រុងប្រយ័ត្នចំពោះជំងឺកូវីដ-១៩ ដោយត្រូវបង្កើនអនាម័យសុខភាពរស់នៅឱ្យបានល្អកុំធ្វេសប្រហែស ត្រូវពាក់ម៉ាស់ ឬក្រម៉ា ហើយត្រូវដុសលាងសម្អាតដៃឱ្យបានស្អាតជាប្រចាំជាមួយសាប៊ូ ទឹកអាល់កុល ឬជែលកម្ចាត់មេរោគ និងបាក់តេរីផ្សេងៗ។
ចំពោះកន្លែងណាដែលមិនចាំបាច់ទៅ សូមកុំទៅ ជាពិសេសកន្លែងដែលមានការប្រមូលផ្តុំមនុស្សច្រើន និងសូមស្តាប់អនុវត្តតាមការណែនាំរបស់ក្រសួងសុខាភិបាលឱ្យបានជាប់ជានិច្ច៕
ដោយ៖ស សារ៉េត
