សារព័ត៌មាន នគរវត្ត តែងតែនាំមុខគេជានិច្ច
ពោធិ៍សាត់ ៖ បុរសវ័យ៥៨ឆ្នាំម្នាក់បានលោតងូតទឹកបណ្តាលឲ្យលង់បាត់ខ្លួនកាលពីថ្ងៃទី៥ ខែសីហា ឆ្នាំ២០២០ វេលាម៉ោង៣និង១០នាទីរសៀល នៅចំណុចប្រកាន់ដៃស្ពានដែក ផ្លូវរថភ្លើង ស្ថិតនៅភូមិពោធិ៍តាគួយ សង្កាត់លលកស ក្រុងពោធិ៍សាត់ ខេត្តពោធិ៍សាត់ ហើយរហូតមកដល់វេលាម៉ោង២និង៣០នាទីរសៀលថ្ងៃទី៧ សីហាទើបគេរកសពឃើញ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុ គេឃើញជនរងគ្រោះឈ្មោះ អ៊ុន វុទ្ធី ភេទប្រុស អាយុ៥៨ឆ្នាំ រស់នៅភូមិសង្កាត់ខាងលើ បានដើរពីទិសខាងជើងមកទិសខាងត្បូងក្នុងភាពស្រវឹងស្រឿងៗ។លុះខណ:មកដល់ចំណុចគល់ស្ពានដែកត្រង់ផ្លូវរថភ្លើង ជនរងគ្រោះបានដោះស្បែកជើងដាក់នៅលើគោករួចដើរទៅឈរតោងបង្កាន់ដៃស្ពាន ហើយក៏លោតចូលក្នុងទឹកស្ទឹងដើម្បីមុជទឹកដូចសព្វដងព្រោះគាត់ចេះហែលទឹកធម្មតាទេ។ប៉ុន្តែ ខណ:នោះអ្នកឃើញហេតុការណ៍បានឃើញគាត់លោតចូលក្នុងទឹកភ្លាមហើយទំនងជាគាត់រមួល ក្រពើក៏ស្រែកឲ្យគេជួយ រួចលិចក្នុងទឹកបាត់ទៅ។លុះដល់ពេលបាត់យូរពេកក៏ផ្អើលឈូរឆរដល់សមត្ថកិច្ចអ្នកធ្វើដំណើរចុះដល់កន្លែងកើតហេតុ ធ្វើឲ្យសមត្ថកិច្ចនាំគ្នាជិះទូកជួយសង្រ្គោះរុករកជនរងគ្រោះដែរតែរកមិនឃើញ។
លុះរហូតមកដល់រសៀលថ្ងៃទី៧ខែសីហាទើបសមត្ថកិច្ចនិងក្រុមគ្រួសាររកឃើញសពអណ្តែតឡើងលើទឹកក៏ស្រង់យកទៅធ្វើបុណ្យតាមប្រពៃណីតែម្តង៕ដោយ៖ប៉ឹម ពិន
