សារព័ត៌មាន នគរវត្ត តែងតែនាំមុខគេជានិច្ច
ក្លិបលីគកំពូលអង់គ្លេស Leicester City បានចុះហត្ថលេខាទិញយកកីឡាករសញ្ជាតិបែលហ្ស៊ិក Timothy Castagne ពីក្លិប Atalanta ក្នុងកិច្ចសន្យារយៈពេល៥ឆ្នាំ។ កីឡាករវ័យ២៤ឆ្នាំរូបនេះរកបាន៥គ្រាប់ក្នុងការបង្ហាញខ្លួន ៧៦ប្រកួតឱ្យក្រុមមកពី Serie A បន្ទាប់ពីផ្លាស់មកពីក្រុម Genk ក្នុងឆ្នាំ២០១៧ ។
ខ្សែការពារ Castagne រូបនេះដែលអាចលេងបានទាំងខ្សែការពារស្លាបបានចូលរួមជាមួយក្រុមរបស់លោក Brendan Rodgers បន្ទាប់ពីការចាកចេញរបស់កីឡាករ Ben Chilwell ទៅកាន់ក្រុមតោខៀវ Chelsea ដែលជាឱកាសធ្វើឲ្យរូបគេបានផ្លាស់មកអង់គ្លេស។
កីឡាកររូបនេះបានបង្ហាញខ្លួនជាអន្តរជាតិលើកដំបូងនៅឆ្នាំ២០១៨ និងជួយឲ្យក្រុមឈ្នះ៧ដងសម្រាប់ក្រុមជម្រើសជាតិបែលហ្ស៊ិកជាសរុបដោយរកបាន២គ្រាប់។ ការផ្លាស់ប្តូរនេះគឺថ្លៃឈ្នួលមិនបានបង្ហាញនោះទេ។
សូមបញ្ជាក់ថា ខ្សែការពារ Castagne បានជួយក្រុម Atalanta មានលក្ខណៈសម្បត្តិគ្រប់គ្រាន់ដើម្បីមានកៅអីទៅប្រកួតក្របខ័ណ្ឌChampions League រដូវកាលមុនជាលើកដំបូងក្នុងប្រវត្តិសាស្រ្តរបស់ក្លិប ហើយក្រុមនេះបានឈានដល់វគ្គ ១/៤ ផ្តាច់ព្រ័ត្រមុនពេលចាញ់ក្រុមParis St-Germain ។ កីឡាកររូបនេះបង្ហាញខ្លួនបាន៣៣ដងសម្រាប់ក្លិបអំឡុងរដូវកាល២០១៩-២០២០ ៕ដោយ៖ភារៈ
