សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បើករថយន្តដឹកស៊ីម៉ងត៍ជ្រុលទៅបុកឡំប្រឺតាកិនជាប់ ហើយព្យាយាមបើករត់ក៏ជ្រុលទៅបុករថយន្ត២គ្រឿងទៀតរួចបានបើករត់គេចចេញពីកន្លែងកើតហេតុអូសទាំងឡំប្រឺតា រងគ្រោះជាច្រើនម៉ែត្របណ្តាលឲ្យមនុស្ស២នាក់ស្លាប់នៅកន្លែងកើតហេតុ។
ហេតុការណ៍នេះបានកើតឡើងនៅវេលាម៉ោង ១០យប់ ថ្ងៃទី១៣ ខែកញ្ញា ឆ្នាំ ២០២០ នៅតាមបណ្ដោយផ្លូវហាណូយ ក្នុងសង្កាត់គោកឃ្លាង ខណ្ឌសែនសុខ រាជធានីភ្នំពេញ ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេបានឃើញ ឡំប្រឺតា និងរថយន្តស៊េរីទំនើបឈប់រង់ចាំភ្លើងស្តុបពណ៌ខៀវ ខណៈនោះដែរ គេបានឃើញរថយន្តដឹកស៊ីម៉ងត៍មួយគ្រឿងពាក់ស្លាកលេខ ភ្នំពេញ3A-3667 បើកបរម្នាក់ឯងមកដល់ចំណុចកើតហេតុហើយក៏ជ្រុលទៅកិនឡំប្រឺតាជាប់ពីក្រោមរថយន្តរួចក៏ជ្រុលទៅបុករថយន្ត២គ្រឿងទៀតបណ្ដាលឲ្យរងការខូចខាត។ ចំណែកឯរថយន្តដឹកស៊ីម៉ងត៍ដែលកិនឡំប្រឺតាជាប់ពីខាងក្រោមហើយព្យាយាមបើករត់គេចអូសទាំងឡំប្រឺតាទៅមុខជាច្រើនម៉ែត្របណ្តាលឲ្យមនុស្ស២នាក់បានស្លាប់យ៉ាងអាណោចអាធ័ម។
បន្ទាប់ពីកើតហេតុសមត្ថកិច្ចមូលដ្ឋានសហការជាមួយនឹងជំនាញបានចុះមកដល់ឃាត់អ្នកបើករថយន្តបង្កហេតុនាំយកទៅអធិការដ្ឋានខណ្ឌ និងបានទំនាក់ទំនងទៅសមត្ថកិច្ចជំនាញចរាចរណ៍ឱ្យចុះមកវាស់វែង និងធ្វើកំណត់ហេតុដើម្បីយករថយន្តទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញរង់ចាំដោះស្រាយនៅពេលក្រោយ ៕ជ្រោយពេជ្រ
