សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ មនុស្ស២នាក់បានស្លាប់បាត់បង់ជីវិតភ្លាមៗនៅនឹងកន្លែងកើតហេតុ និងម្នាក់ទៀតរងរបួសធ្ងន់ក្នុងហេតុការណ៍គ្រោះថ្នាក់ចរាចរណ៍ម៉ូតូនិងម៉ូតូបុកគ្នាពេញទំហឹង បណ្ដាលឲ្យដួលស្របពេលរថយន្តមួយគ្រឿងទៀតបើកមកដល់ឈប់មិនទាន់ក៏កិនជនរងគ្រោះតែម្ដង។ហេតុការណ៍គ្រោះថ្នាក់ចរាចរណ៍នេះ បានកើតឡើងនៅថ្ងៃទី២៦ ខែកញ្ញា ឆ្នាំ២០២០ វេលាម៉ោង១៩និង៥នាទីលេីផ្លូវជាតិលេខ៦១ ចន្លោះគីឡូម៉ែត្រ១២-១៣ ស្ថិតក្នុងភូមិថ្នល់បត់ ឃុំកោះចិន ស្រុកពញាឮ ខេត្តកណ្តាល។
មន្ត្រីនគរបាលចរាចរណ៍ស្រុកពញាឮបានឲ្យដឹងថា ជនរងគ្រោះស្លាប់មានគ្នា២នាក់ពុំទាន់ស្គាល់អត្តសញ្ញាណ ជាអ្នកបើកនិងអ្នករួមដំណើរលើម៉ូតូម៉ាក Honda dream C125 ពណ៌ខ្មៅពាក់ស្លាកលេខភ្នំពេញ 1IA-8711។ ចំណែកភាគីម៉ូតូម្ចាងទៀតម៉ាកSuzuki Smash ពណ៌ខ្មៅ ពាក់ស្លាកលេខ កណ្តាល1D-3895 បេីកបរដោយឈ្មោះ ឡន សំណាង ភេទប្រុស អាយុ៣៥ឆ្នាំ មានទីលំនៅភូមិសំបូរ ឃុំសំបូរ ស្រុកបាធាយ ខេត្តកំពង់ចាម(របួសធ្ងន់)។ ដោយឡែករថយន្តកិនមនុស្សស្លាប់មិនស្គាល់ម៉ាកបើកបរដោយជនមិនស្គាល់អត្តសញ្ញាណ។
ប្រភពដដែលបន្តថា នៅវេលាថ្ងៃខែឆ្នាំកេីតហេតុខាងលេី មានម៉ូតូមួយគ្រឿងម៉ាក Honda Dream C125 ពណ៌ខ្មៅពាក់ស្លាកលេខភ្នំពេញ 1IA-8711បេីកបរក្នុងទិសដៅពីកេីតទៅលិច(កំពង់ចាម-ព្រែកក្តាម)ដោយមានអ្នករួមដំណើរម្នាក់។ លុះបេីកមកដល់ចំណុចកេីតហេតុ បានបុកជាមួយម៉ូតូមួយគ្រឿង ម៉ាកSuzuki Smash ពណ៌ខ្មៅ ពាក់ស្លាកលេខ កណ្តាល1D-3895.ដែលបេីកបរមានទិសដៅពីលិចទៅកេីត(ព្រែកក្តាម-កំពង់ចាម)បេីកបរដោយឈ្មោះ ឡន សំណាង ភេទប្រុស អាយុ៣៥ឆ្នាំ មានទីលំនៅភូមិសំបូរ ឃុំសំបូរ ស្រុកបាធាយ ខេត្តកំពង់ចាម(របួសធ្ងន់) បណ្ដាលឲ្យជនរងគ្រោះជាអ្នកបើកបរម៉ូតូទាំង២គ្រឿងដួល ស្របពេលនោះដែរក៏មានរថយន្តមិនស្គាល់អត្តសញ្ញាណបើកមកពីក្រោយឈប់មិនទាន់ក៏កិនអ្នកបេីកបរម៉ូតូHonda Dream C125និងអ្នករួមដំណេីរ បណ្តាលឱ្យស្លាប់ទាំងពីរនាក់នៅនឹងកន្លែងកេីតហេតុតែម្តង ។
ក្រោយពេលកេីតហេតុ កម្លាំងផ្នែកជំនាញ បានចុះមកដល់ធ្វើការវាស់វែង និងបានហៅរថយន្តសង្គ្រោះដឹកអ្នករបួសធ្ងន់ទៅមន្ទីរពេទ្យ រីឯសាកសពជនរងគ្រោះទាំងពីរនាក់ ត្រូវបានសមត្ថកិច្ចធ្វើការស្រាវជ្រាវរកសាច់ញាតិបងប្អូនមកទទួលយកសពទៅធ្វេីបុណ្យតាមប្រពៃណី៕ ស្អាងជ័យ
