សារព័ត៌មាន នគរវត្ត តែងតែនាំមុខគេជានិច្ច
ក្រុមអ្នកលក់ដូរ ពិសេសគឺអាហារនៅតាមផ្លូវដោយរទេះរុញ ពេលនេះត្រូវបានគេចាត់ទុកថាជា«ក្រុមចារកិច្ច» ដោយអាចទទួលបានព័ត៌មានយ៉ាងឆាប់រហ័សស្តីពីទីតាំងដែលត្រូវធ្វើបាតុកម្ម។ ក្រុមអ្នកលក់តាមចិញ្ចឹមថ្នល់ អាចដឹងមុនប៉ូលិសទៅទៀតថា ទីកន្លែងណានឹងត្រូវបានបាតុកម្មកើតឡើង ហើយពួកគាត់បានទៅរង់ចាំនៅទីនោះដើម្បីលក់ដូរ។
សារព័ត៌មានរ៉យទ័របានផ្សាយថា បើទោះបីលក់អាហារតិចតួច ដូចជាជើងមាន់ ស្លាបមាន់ ប្រហិត…ការ៉ែមដូង ជាដើម ប៉ុន្តែការលក់ដូរបែបនេះកំពុងតែពេញនិយមនិងរកប្រាក់ចំណូលបានច្រើន ដោយសារតែមានបាតុកម្មនៅក្នុងទីក្រុងបាងកក។
អ្នកលក់តាមរទេះរុញម្នាក់ឈ្មោះ Petch អាយុ២៩ឆ្នាំបានឲ្យដឹងថា«យើងបានតាមដានព័ត៌មានយ៉ាងយកចិត្តទុកដាក់។
មិនតែប៉ុណ្ណោះបានស៊ើបសួរព័ត៌មានពីគម្រោងធ្វើបាតុកម្មដើម្បីបង្កើនការលក់ដូរក៏ដូចជាទៅកាន់ទីនោះឲ្យបានទាន់ពេលវេលា។ ក្រុមអ្នកលក់អាហារ ភេសជ្ជៈតាមរទេះរុញបានបង្កើតជាក្រុម មានទំនាក់ទំនងគ្នាល្អ ផ្តល់ព័ត៌មានឲ្យគ្នាទៅវិញទៅមកយ៉ាងឆាប់បំផុតពីព័ត៌មានពាក់ព័ន្ធ នឹងទីកន្លែងនិងពេលវេលាធ្វើបាតុកម្ម។ ទាំងនោះហើយបានជាក្រុមបាតុករហៅយើងខ្ញុំថាជាក្រុម«CIA»។
អាចនិយាយបានថា ក្រុមអ្នករកស៊ីតាមចិញ្ចើមថ្នល់រកប្រាក់បានច្រើននាពេលនេះ ដោយបាតុករមិនអាចទៅរកអ្វីញាំបានល្អជាងអាហារនៅតាមផ្លូវស្រាប់។ បាតុករមួយរូប ឈ្មោះPloy អាយុ២៨ឆ្នាំបានឲ្យដឹងថា «ក្រុមអ្នកលក់ដូរបានទៅកាន់ទីកន្លែងមុនពួកយើងទៅទៀត ហើយពួកគាត់ផ្លាស់ទីតាំងតាមពួកយើង តែមុនពួកយើងរហូត»។
អ្នកលក់អាហារម្នាក់ឈ្មោះ វីន អាយុ ៣៧ឆ្នាំបានឲ្យដឹងថា«ខ្ញុំទៅកន្លែងបាតុកម្ម លក់អាហារប្រហែលជាង១ម៉ោង គឺអស់រលីង»។ បច្ចុប្បន្នក្រុមបាតុករថៃកំពុងតែធ្វើបាតុកម្មទាមទារឱ្យនាយករដ្ឋមន្ត្រីប្រាយុទ្ធចាន់អូចា លាលែងចេញពីតំណែង ដោយទុករយៈពេលឲ្យតែ៣ថ្ងៃប៉ុណ្ណោះ។ នៅពេលនេះ នាយករដ្ឋមន្ត្រីថៃមិនទាន់មានប្រតិកម្មអ្វីជុំវិញការប្រកាសរបស់ក្រុមបាតុករនៅឡើយទេ៕ដោយ៖ធី រីណា
