សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើតាមការអះអាងរបស់ប្រធានាធិបតីរុស្ស៊ីលោក វ្ល៉ាឌីមៀ ពូទីននិយាយថា លោកជាអ្នកធ្វើអន្តរាគមន៍ដោយផ្ទាល់ ដើម្បីធានាថាមេដឹកនាំប្រឆាំងរុស្ស៊ី Alexei Navalny អាចទទួលបានការព្យាបាលនៅអាល្លឺម៉ង់។បន្ទាប់ពីមេដឹកនាំប្រឆាំងរូបនេះ កាលពីថ្ងៃទី២០ខែសីហាកន្លងទៅ បានធ្លាក់ខ្លួនឈឺ និងមិនដឹងខ្លួន ត្រូវបានអង្គការហាមឃាត់អាវុធគីមី (OPCW) យកសំណាកឈាមរបស់លោកពិនិត្យ និងអះអាងថា មានផ្ទុកសារធាតុគីមីដែលប៉ះពាល់ដល់ប្រព័ន្ធប្រសាទប្រភេទ Novichok ។ នេះបើយោងតាមទីភ្នាក់ងារព័ត៌មាន Reuters។
ជាក់ស្តែងថ្លែងក្នុងកិច្ចជំនួប Valdai Discussion Club លោក ពូទីនបញ្ជាក់ថា រូបលោកបានស្នើសុំឲ្យអគ្គរដ្ឋអាជ្ញារុស្ស៊ី អនុញ្ញាតឲ្យលោកAlexei Navalny ចាកចេញពីប្រទេសរុស្ស៊ីដើម្បីអាចទទួលបានការព្យាបាល តបតាមសំណើរបស់ភរិយាលោក Navalny។ ក្រោយទទួលបានការថែទាំ និងដឹងខ្លួន មេដឹកនាំប្រឆាំងរូបនេះ បែបជាចោទរដ្ឋាភិបាលរុស្ស៊ីថា ជាអ្នកបំពុលរូបលោក។ រដ្ឋាភិបាលរុស្ស៊ីតបថា ការចោទនេះជារឿងមិនពិត និងជាការប្រមាថរដ្ឋាភិបាល ។
ប្រធានាធិបតីរុស្ស៊ីលោក វ្ល៉ាឌីមៀ ពូទីន អះអាងទៀតថា លោក Navalny ជាប់បំរាមដែលមិនអាចធ្វើដំណើរ ព្រោះលោកស្ថិតក្រោមការស៊ើបអង្កេតដោយតុលាការ និងករណីព្រហ្មទណ្ឌ។ លោក ពូទីន បានសង្កត់ធ្ងន់ថា៖«ទោះជាយ៉ាងណាក្តីខ្ញុំបានធ្វើសំណើទៅអគ្គរដ្ឋអាជ្ញាដើម្បីទទួលបានការអនុញ្ញាត ហើយគាត់ (Navalny) បានចាកចេញពីប្រទេស»។លោកបកស្រាយទៀតថា បើសិនជារុស្ស៊ីចង់បំពុលNavalny នោះរដ្ឋាភិបាលនឹងមិនឲ្យលោកចេញពីប្រទេសឡើយ។
គួរបញ្ជាក់ផងដែរថា ការធ្លាក់ខ្លួនឈឺរបស់មេដឹកនាំប្រឆាំង Navalny ដោយសារសារធាតុគីមី បានធ្វើឲ្យបណ្តាប្រទេសលោកខាងលិចថ្កោលទោសនិងរិះគន់រុស្ស៊ី ដោយចោទថា ជាអ្នកនៅពីក្រោយ។ ចំណែកសហភាពអឺរ៉ុបនិងចក្រភពអង់គ្លេស កាលពីសប្តាហ៍កន្លងទៅ បានដាក់ទណ្ឌកម្មលើមន្ត្រីរដ្ឋាភិបាលរុស្ស៊ីចំនួន៦រូប ដែលរួមមានមន្ត្រីជាន់ខ្ពស់ និងអ្នកស្រាវជាវសារធាតុសារធាតុគីមីពុលនៅមន្ទីរពិសោធន៍រដ្ឋរុស្ស៊ី។
ដោយឡែកជុំវិញបញ្ហានេះដែរ រដ្ឋាភិបាលរុស្ស៊ី ថ្កោលទោសការដាក់ទណ្ឌកម្មទាំងនោះដោយអះអាងថាប៉ះពាល់ដល់ទំនាក់ទំនងទ្វេភាគី និងថា ជាការចោទប្រកាន់ដោយគ្មានអំណះអំណាងត្រឹមត្រូវ។ រុស្ស៊ីក៏អះអាងផងដែរថានឹងធ្វើការសងសឹកឲ្យសមស្របវិញ។
សូមជម្រាបថា លោក Alexei Navalny ជាមេដឹកនាំប្រឆាំងនៅរុស្ស៊ី ដែលតែងលើកឡើងពីអំពើពុករលួយក្រោមការដឹកនាំរបស់លោក ពូទីន ។ លោកត្រូវបានគណៈកម្មការរៀបចំការបោះឆ្នោតរុស្ស៊ីហាមមិនឲ្យឈរឈ្មោះបោះឆ្នោតផងដែរ៕ដោយ៖ស តារា
