សារព័ត៌មាន នគរវត្ត តែងតែនាំមុខគេជានិច្ច
សកម្មជននយោបាយនៅហុងកុង៤រូបបានសុំចូលក្នុងស្ថានកុងស៊ុល អាមេរិកដើម្បីភៀសខ្លួន ក្រោយពេលប៉ូលិសកោះហុងកុងបានចាប់ខ្លួនអតីតមេដឹកនាំបាតុកម្មកាលពីឆ្នាំទៅ។
សារព័ត៌មាន South China Morning Post (SCMP)នៅរសៀលថ្ងៃទី២៧ខែតុលា បានផ្សាយថា សកម្មជនហុងកុង៤រូបបានស្នើសុំចូលស្ថានកុងស៊ុលអាមេរិក ដើម្បីបញ្ចៀសការចាប់ខ្លួនពីកម្លាំងសន្តិសុខ ។
ឃ្លីបវីដេអូដែល (SCMP) បានផ្សព្វផ្សាយបង្ហាញឲ្យឃើញថា មានមនុស្ស៤នាក់បានរត់ទៅកាន់ផ្លូវ Garden ហើយនិយាយជាមួយក្រុមសន្តិសុខមុនពេលចូលក្នុងអគារស្ថានកុងស៊ុល។
ប្រភពព័ត៌មានបានឲ្យដឹងថា ក្នុងចំណោមមនុស្ស៤នាក់ដែលសុំសិទ្ធិភៀសខ្លួន មានម្នាក់ប្រឈមការចោទប្រកាន់ពីបទដឹកនាំធ្វើបាតុកម្មប្រឆាំងរដ្ឋាភិបាល កាលពីឆ្នាំ២០១៩។
លោក Tony Chung Hon-lam អតីតមេដឹកនាំក្រុមនិស្សិតត្រូវបានក្រុមសន្តិសុខ៣នាក់ចាប់ខ្លួននៅវេលាម៉ោង៨ព្រឹក នៅហាងកាហ្វេPacific Coffee ទល់មុខស្ថានកុងស៊ុលអាមេរិក។
គិតមកដល់ថ្ងៃទី១៥ខែតុលា កម្លាំងប៉ូលិសហុងកុងបានចាប់ខ្លួនមនុស្ស២៨នាក់ដោយចោទប្រកាន់ពីបទ ចូលរួមធ្វើសកម្មភាពបង្កគ្រោះថ្នាក់ដល់សន្តិសុខកោះហុងកុង។ ក្នុងចំណោមសកម្មជនហុងកុង២៨នាក់ដែលបានចាប់ខ្លួន មានអ្នកខ្លះត្រូវចាប់ខ្លួនដល់ទៅពីរលើក៕ដោយ៖ធី រីណា
